The Noble Qur'an Encyclopedia

Simoore, Min njippinii nde Min farlii nde, Min njippini e ndeer mayre aayeeje ɓannguɗe mbelejo'o onon on mbaajitoto.

Debbo jinoowo on e gorko jinoowo on foccee gooto kala e maɓɓe paatawol(looci) teemedere, wota njurmeende maɓɓe nanngu on e fii Diina Alla ka, si tawii on laatike hoɗon ngooŋɗini Alla e Ñalaande Laakara nden. Yo seedo foccugol ɓe ngol jamaa immorde e gooŋɗinɓe ɓen.

Gorko jinoowo on o resataa si wonaa debbo jonoowo maaɗum cirkoowo, debbo jinoowo on resata mo si wonaa gorko jinoowo ma cirkoowo, ɗum harminaama e dow gooŋɗinɓe ɓen.

E ɓen ɓe no tukka rewɓe saŋiiɓe ɓen refti ɓe ngaddaani seedeeɓe nayo, piyee ɓe paatawol(lo'oci) cappanɗe jeetati. Wota on njaɓan ɓe ceedagol poomaa. Ɓen ɗon, ko kamɓe ngoni Faasiqiiɓe ɓen.

Si wonaa ɓen tuubuɓe ɓaawo ɗuum ɓe moƴƴini. Pellet, Alla ko O cuhroowo jurmeteeɗo.

E ɓeen ɓe no tukka sonnaaɓe maɓɓe ɓen hara laatanaaki ɓe seedeeɓe si wonaa wonkiiji maɓɓe ɗin, ko yo goɗɗo e maɓɓe seedo seedeeji nayi [o woondira] Alla pellet, kako ko e googuɓe ɓen o jeyaa.

Jowaɓun ɗum, won'dema yo kuddi Alla wonu e dow makko si o laatike jeyaaɗo e fenooɓe ɓeen.

Ɓe nduñira e [sonnaajo on] lepte ɗen, nde o seedotoo seedeeji nayi [o woondira] Alla, pellet [gorko on] ko e fenooɓe ɓen o jeyaa.

Jowaɓum ɗum, ko nde Alla tikkata e dow makko si [gorko on] laatike ko e gooŋuɓe ɓen o jeyaa.

Sinndo wonaano Ɓural Alla ngal e dow mooɗon e Yurmeende Makko nden, e wonan'dema Alla ko O jaɓoowo tuubuubuye Ñeeñɗo.

Pellet, ɓeen adduɓe penaale ɗen ko ɓe jamaa jeyaaɗo e mooɗon, wota on cikku ɗum ko bone mo'on; ko woni ɗum ko moƴƴere mo'on. No woodani kala neɗɗo immorde e maɓɓe ko o faggitii kon e bakkaat, on fawtiiɗo [bakkaat on] immorde e maɓɓe, no woodani mo Lepte mawɗe.

Ko haɗno oo tuma nde nanɗon ɗum, worɓe gooŋɗinɓe ɓen e rewɓe gooŋɗinɓe ɓen ɓe njananee ka wonkiiji maɓɓe ko moƴƴi, ɓe mbi'a: "Ɗum ko penaale ɓannguɗe nii".

Ko haɗno ko nde ɓe ngaddata e ɗum seedeeɓe nayo, si ɓe ngaddaani seedeeɓe ɓen; haray ɓeen ɗon, to Alla ko kamɓe ngoni fenooɓe ɓen.

Sinndo wonaano ɓural Alla ngal e yurmeende makko nden e dow mooɗon e aduna e yo La'akara Lepte mawɗe meematno on fii kon ko ukkiɗon e muuɗum.

Tuma nde werloraynoɗon ɗum ɗenmɗe mooɗon, wowliron kunnduɗe mooɗon kon ko ganndal alana on e muuɗum sikkon ɗum kadi ko newiiɗum, hara non ɗum ko mawnuɗom ka Alla.

Ko haanunoo tuma nanɗon nde, mbi'on: "Haanaa min nde min wowlata e dum, Senayee woodanii ma, ɗum ko fenaande mawnde nii".

Alla no waajaade on fii wota on fillo sugu [ndee fenaande] poomaa, si tawii on laatike gooŋɗinɓe.

Alla no ɓannginannde on Aayeeje ɗen Alla ko O ganduɗo ñeeñɗo.

Pellet, ɓeen yiɗɓe yo bone ɗen sa'ako e [hoore] ɓen gooŋɗinɓe; no woodani ɓe Lepte muusɗe ka aduna e ka Laakara. Alla no Anndi, onon on nganndah.

Sinndo wonaano Ɓural Alla ngal e dow mooɗon e Yurmeende makko nden e tawde pellet, Alla ko o Newiiɗo jurmotooɗo o.

Eey mon ɓen gooŋ ɗinɓe, wota on mjokku ɗate Seytaane ɗen, kala jokkuɗo ɗate Seytaane ɗen, pellet, o yamirat [mo] ko boni kon e ko añaa kon. Sinndo wonaano Ɓural Alla ngal e dow mooɗon e Yurmeende Makko nden; hay e gooto e mooɗon laaɓataano poomaa, kono Alla homo laɓɓina on mo o muuyi. Alla ko O Nanoowo gannduɗo.

Wota joomiraaɓe ɓural ngal e yaajeende nde e mooɗon wooɗndu wonan'dema ɓe okkortaa ɓadondiraaɓe ɓen e ɓilliiɓe ɓen e ferɓe ɓen ka Laawol Alla, yo ɓe yaafo. Kaa on yiɗaa yo Alla yawtan on? Alla ko o jawtoowo Yurmeteeɗo.

Pellet, ɓeen wonɓe tukkude [sonnaaɓe] saŋiiɓe welsindiiɓe gooŋɗinɓe, ɓe huɗaama ka aduna e ka Laakara no woodani ɓe Lepte mawɗe.

Ñande seedoytoo e dow maɓɓe ɗemɗe maɓɓe ɗen e juuɗe maɓɓe ɗen e koyɗe maɓɓe ɗen, ko ɓe laatinoo kon heɓe ngolla.

Nden Ñande Alla huuɓinanay ɓe [njoɓdi] Diina maɓɓe Goongaha kan, ɓe ngannda pellet, Alla ko Kaŋko woni Goonga Ɓannguka kan.

Rewɓe soɓɓe ɓen ko fii worɓe soɓɓe ɓen. Worɓe soɓɓe ɓen ko fii rewɓe soɓuɓe ɓen. Rewɓe laaɓɓe ɓen ko fii worɓe laaɓɓe ɓen, worɓe laaɓuɓe ɓen ko fii rewɓe laaɓuɓe ɓen. Ɓee ɗoo ko hisnaaɓe e kon ko ɓe wowlata, no woodani ɓe haforaneede e arsike tedduɗo.

Eey mon yo gooŋɗinɓe, wota on naat e cuuɗi tanaa cuuɗi mo'on ɗin haa duŋinoɗon calminon e dow yimɓe majji ɓen, ko ɗum ɓuri moƴƴannde on. Mbelejo'o jo'o onon on mbaajitoto.

Si on tawaani ndeer ton goɗɗo, wota on naat toon haa duŋaneɗon, si on mbi'aama: "Yiltee" yiltee, ko ɗuum ɓuri laaɓannde on. Alla non homo Anndi ko ngolloton kon.

Bakkaatu fawaaki on nde naatoton e cuuɗi ɗi koɗiraaka hara no e ndeer majji miranhoy mo'on, Alla non homo Anndi ko ngonɗon e feññinde e ko ngonɗon e suuɗude.

Maakan worɓe gooɗinɓe ɓen yo ɓe meeru ndaarɗe maɓɓe ɗen ɓe ndeena farjuuji maɓɓe ɗin, ko ɗuum ɓurata laɓɓinnde ɓe. Pellet, Alla ko o kumpitiiɗo ko ɓe ngollata.

Maakan rewɓe gooŋɗinɓe ɓen yo ɓe meernu ndaarɗe maɓɓe ɗen, ɓe ndeena farjuuji maɓɓe ɗin, wota ɓe peññin cuɗaari maɓɓe ndin si wonaa ko feeñi kon e mayri. Yo ɓe fawu tiggaaje maɓɓe ɗen ka becce maɓɓe, wota ɓe feññinan cuɗaari maɓɓe ndin si wonaa genndiraaɓe maɓɓe ɓen ma baabiraaɓe maɓɓe ma baabiraaɓe genndiraaɓe maɓɓe ma ɓiɗɓe maɓɓe, ma ɓiɗɓe genndiraaɓe maɓɓe ma musiɗɓe maɓɓe, ma ɓiɗɓe musiɗɓe maɓɓe, ma ɓiɗɓe banndiraaɓe maɓɓe, ma sonnaaɓe maɓɓe, maaɗum ɓen ɓe ɓe jeyiri ñaame maɓɓe ma ɓen worɓe jokkooɓe ɓe haaju mun alaa e rewɓe, ma boobo mo ƴellitaaki e awraaji sonnaaɓe ɓen. Wata ɓe tappindir koyɗe maɓɓe ɗen fii yo Annde ko ɓe suuɗi kon immorde e cuɗaari maɓɓe. Tuubee ruttoɗon ka Alla on fow mo'on, ko onon yo gooŋɗinɓe mbelejo'o jo'o on malete.

Ndesinee ɓe ndesaani ɓeen e mooɗon e moƴƴuɓe ɓen immorde e muccuɓe mooɗon e horɓe mooɗon, si ɓe laatike waasɓe Alla alɗinat ɓe immorde e Ɓural makko ngal, Alla ko o jaacɗo gannduɗo.

Ɓe keɓaani fehre desugol ɓeen yo ɓe cabbo haa Alla alɗinira ɓe Ɓural makko ngal. Ɓeen ɗaɓɓatɓe soottaade e ɓen ɓe ñaame mooɗon njeyi, coottaadede ɓe si on nganndii e maɓɓe moƴƴere, njonnee ɓe immorde e jawdi Alla ndin, ndin ndi O jonni on, wota on waawnu horɓe mooɗon ɓen e fii jeeno, si ɓe faandike saŋaade, wota on ɗaɓɓu jawkal ngurndam aduna, kala waawnuuɗo ɓe pellet, Alla ɓaawo baawnugol ɓe ko O cuhroowo jurmiteeɗo.

Gooŋɗii min njippinii e mooɗon aayeeje ɓannguɗe e misal immorde e ɓeya wulinooɓe ko adii on e waaju wonan'de hulooɓe [Alla] ɓen.

Ko Alla woni annoore kammuuli ɗin e leydi ndin, sifa annoore makko nde ko wano tuɗɗere hara no e mayre pitilol(lampu), pitilol ngol wona e ndeer biiniiri, biiniiri ndin hara hindi wa'i wa hoodere jalbunde hinde huɓɓa immorde e leggal barkinaangal nebbantewal ngal wonaa funnaangeyaŋkowal ngal wonaa hirnaangeyaŋkowal nebbam maggal ɗam no ɓadoo jalbude, hay si yiite memaani ɗam, annoore e hoore annoore, Alla no feewnira annoore makko nde oon mo o muuyi, Alla no piyana yimɓe ɓen mise, Alla ko o gannduɗo kala hu'unde.

E nder cuuɗi ɗi Alla duŋii(sakkiti) yo darne Innde makko jaŋtee e ndeer majji Subunhinanee mo ndeer majji ka bimmbi e ka kiikiiɗe.

Worɓe ɓe njulaaku e njeyngu maapintaa ɗum ga jaŋtagol Alla e ñimnugol Juulde nden e tottu- gol askal on, heɓe kuli Ñalaande nde waylitoytoo e muuɗum ɓerɗe ɗen e jiiɗe ɗen.

Fii yo Alla yoɓoyɓe ko ɓuri moƴƴude ko ɓe ngollunoo kon, O ɓeydana ɓe e Ɓural makko ngal. Alla no arsika on mo O muuyi ko Aldaa hasboore.

Ɓen yedduɓe, golle maɓɓe ɗen no mba'i wa merere won'nde e boowal, ɗomɗaaɗo on no sikka ko nde ndiyam, haa si o arii e mayre o tawataa hay e hu'unde, o tawa Alla ka makko O huuɓinana mo hasboore makko nden, Alla ko O jaawɗo Hasboore.

Ma ko wano niɓe e maayo luggungo, no suddi ngo bempeƴƴe no dow maggo bempeƴƴe no dow majje duule, niɓe yoga e majje no e dow yoga, si o yaltinii junngo makko ngon o ɓadotaako ji'igol ngo. oon mo Alla waɗanaani annoore hara o alaa annoore.

Enee, a yiaani wonan'dema Alla no subuhinanaade Mo ɓen wonɓe ka kammuuli e ka leydi e colli ɗin kadi ko saffiniiɗi? Gooto kala e ɗii gooŋɗii anndii juulde mu'um nden e subuhinaali mu'um ɗin, Alla ko O gannduɗo ko ɓe ngollata.

Ko Alla heeranii Laamu kammuuli ɗin e leydi ndin, ko fa'ade ka Alla woni waɗtinirde nden.

Enee, a nji'aani won'dema Alla homo sogga duulere, refti o hawtindira nde, refti o waɗa nde fawondirnde haɗa yi'a toɓo ngon no yalta e ndeer mayre, ngo jippoo immorde ka kammu, immorde e pelle no e ndeer mayre marmalle homo heewtina ɗe on mo o Muuyi, homo pottina ɗe on mo o muuyi? Ndaneeri maƴe mayre no do'a naɓde giiɗe ɗen.

Alla homo waylita jemma on e ñalawma on, pellet, na wonii e ɗum tasakuyee wonan'de joomiraaɓe jiiɗe ɓen.

Ko Alla tagii kala kullel immorde e ndiyam, no e majji yaarooji reedu muuɗum, no e majji yaarooji koyɗe muuɗm no e majji kadi yaarooji [koyɗe] nayi. Alla homo Taga ko o muuyi, pellet, Alla ko kattanɗo kala hu'unde.

Gooŋɗii Min njippinii Aayeeje ɓannguɗe, Alla no feewna on mo O muuyii fa'ade e Laawol Pocciingol ngol.

Heɓe mbia: "Min gooŋɗinii Alla e Nulaaɗo on, min ɗoftike, refti huccita fedde goo e maɓɓe, ɓaawo ɗuum, ɓen wonaani gooŋɗinɓe".

Si ɓe noddaama fa'ade ka Alla e Nulaaɗo makko on fii yo o ñaawu hakkunde maɓɓe, tawa fedde goo e maɓɓe ko ɓe ɗuurniiɓe.

Si tawii ko kamɓe mari goonga ka, ɓe ngara e makko ko ɓe ɗoftiiɓe.

Enee, ko nawnaare woni ka ɓerɗe maɓɓe, kaa ɓe sikkiti, kaa ɓe hulu wota Alla e Nulaaɗo makko on tooñu ɓe? Ko woni, ɓee ko kamɓe woni tooñooɓe ɓen.

Anndu ko woni konngol gooɗinɓe ɓen si ɓe noddaama faade ka Alla e Nulaaɗo makko on fii yo o ñaawu hakkunde maɓɓe, ko nde ɓe mbi'ata: "Min nanii men ɗoftike." Ɓen ɗon ko kamɓe woni malaaɓe ɓen.

Kala ɗoftiiɗo Alla e nulaaɗo makko on o kuli Alla o rentii [e Lepte makko ɗen] haray ɓen ɗon ko kamɓe ngoni malaaɓe ɓen.

Ɓe ngooɗndiri Alla, e hattirde goondooje maɓɓe, si a yamirii ɓe ma ɓe njaltu sanne. Maaku: "wota on ngooɗndu, ɗoftaare no nganndaa, pellet, Alla ko kumpitiiɗo ko ngolloton"

Maaku: "Ɗoftee Alla ɗoftoɗon Nulaaɗo on". Si ɓe nduŋtiima anndu ko fawii mo ko, ko o roondaa kon, no fawii on ko ndoonda ɗo kon, si on ɗoftike mo on peewat, fawaaki Nulaaɗo on si wonaa jottinngol ɓanngungol.

Alla Fodii ɓen gooŋɗinɓe e mooɗon ɓe ngolli moƴƴi ɗin o lomtinat ɓe ka leydi wano O lomtinirnoo non ɓen adiiɓe ɓe, ma O weeɓinan ɓe diina maɓɓe ka O welanaa ɓe, ma O wattitan ɓe ɓaawo kulol maɓɓe ngol hoolaare, Yo ɓe ndewam wota ɓe cirkanam hay e hu'unde. Kala jedduɗo ɓaawo ɗum haray ɓen ɗon ko kamɓe woni faasiqiiɓe ɓen.

Ñiiɓee e Juulde totton askal on ɗoftoɗon kadi nulaaɗo on, mbela jo'o on njurmete.

Wota a sikku ɓeen yedduɓe ɓe laawoto ka leydi, jaaƴorde maɓɓe nden ko ka Yiite, pellet, bonii wattnde.

Eey mon yo gooŋɗinɓe, yo sakkintino e mooɗon ɓen ɓe ñaame mooɗon jeyi, e ɓen ɓe njottaaki koyɗol immorde e mooɗon, laabi tati ko adii Juulde Peeral nden, e tuma mballinton conci mooɗon ka njollooro e ka ɓaawo Juulde geeƴe ko awraaji mooɗon tati non. Bakkaatu fawaaki on fawaaki ɓe ɓaawo majji, jinndooɓe hakkunde mooɗon, yoga e mooɗon e dow yoga. Ko wano nii Alla ɓanngini- rani on aayeeje ɗen Alla ko O gannduɗo Ñeeñuɗo.

Si sukaaɓe mooɗon njottike kellefuyee, yo ɓe cakkitinono wano duŋinornoo non ɓen adiiɓe ɓe, ko wano nii Alla ɓannginiranta on sayeeje makko ɗen, Alla ko O gannduɗo Ñeeñɗo.

E sonnaaɓe jottiiɓe ɓen, ɓen ɓe njoortaaki desal bakkaatu fawaaki ɓe nde ɓe wallinta conci maɓɓe ɗin hara ɓe wonaa feññinɓe cuɗaari, ko nde ɓe nantotoo ɓuri moƴƴannde ɓe, Alla ko O Nanoowo gannduɗo.

Bakkaat fawaaki bumɗo on, bakkaatu fawaaki laƴoowo on, bakkaat fawaaki ñawɗo on, fawaaki e wonkiiji mooɗon nde ñaamoton ka cuuɗi mooɗon maaɗum ka cuuɗi baabiraaɓe mooɗon, maaɗum ka cuuɗi neeniraaɓe mooɗon, maaɗum ka cuuɗi musiɗɓe mooɗon, maaɗum ka cuuɗi banndiraaɓe mooɗon, maaɗum ka cuuɗi bappiraaɓe mooɗon, maaɗum ka cuuɗi yaayiraaɓe mooɗon, maaɗom ka cuuɗi kaawiraaɓe mooɗon, maaɗum ka cuuɗi neeniraaɓe mooɗon ka dewol, maaɗum ɗin ɗi jogiɗon cottirɗe muuɗum, maaɗum giɗo mooɗon. Bakkaat fawaaki on nde kawtoton ñaamon maaɗum ñaamon ko on sertuɓe. Si on naatay e cuuɗi salminee e dow woŋkiiji mooɗon, salminango immorde ka Alla barkinaango laaɓngo, ko wano nii Alla ɓannguniranta on aayeeje ɗen mbelejo'o onon on kaqqilay.

Anndu gooŋɗinɓe ɓen ko ɓen gooŋɗinɓe Alla e Nulaaɗo makko on, si ɓe laatike hiɓe wonndi e makko e dow fiyaake moftuɗo, ɓe njahatah haa ɓe duŋinoo e makko, pellet, ɓen ɗaɓɓirayɓe ma duŋayee ko ɓen ɗon woni gooŋɗinɓe Alla e Nulaaɗo makko on, si ɓe ɗaɓɓirii ma duŋayee fii yoga e fiyaake maɓɓe, duŋano on mo yiɗɗaa [duŋanaade] e maɓɓe, imsinanoɗaa ɓe ka Alla. Pellet, Alla ko cuhroowo jurmeteeɗo.

Wota on mbaɗ noddugol Nulaaɗo on hakkunde mooɗon wano noddugol yoga e mooɗon yoga. Gooŋɗii Alla no Anndi ɓeen sortotooɓe e mooɗon e moltagol, ɓen wonɓe lunndaade yamaruyee makko on, yo ɓe rento fii wata fitina hiɓu ɓe maaɗum Lempte mu'usuɗe heɓa ɓe.

Ko non woniri, pellet, ko Alla heeranii ko woni kon ka kammuuli e ka leydi gooŋɗii homo Anndi ko ngonɗon e hoore mu'um kon, Ñande ɓe nduttetee fa'ade ka makko p yeetoo ɓe ko ɓe ngollunoo kon. Alla ko O gannduɗo kala hu'unde.