The Noble Qur'an Encyclopedia

Eey mon yo ɓen gooŋɗinɓe ! wota on adito ye'eso Allah e Nulaaɗo makko on. Hulee Allah. Pellet, Allah ko Nanoowo, Ji'oowo.

Eey mon yo ɓen gooŋɗinɓe ! wota on toownu hitooji mon e dow hito Annabaajo on, wota on ewnor mo kadi konngol, wano no yoga mon ewnorta yoga, sakko golle mon ɗen mbonata, hara on so'aa-anndude.

Pellet, ɓeen joltinooɓe hotooji maɓɓe ɗin ka Nulaaɗo Allah on, ko ɓen ngoni ɓe Alla jarabii ɓerɗe mum ɗen gooŋɗal. Hino woodani ɓe haforanal e njoɓdi mawndi.

Pellet, ɓeen ɓe no noddire ka ɓaawo cuuɗi, ko ɓuri ɗuuɗude e maɓɓe, wonaa haqqilooɓe.

Sinno ɓe muññino haa njaltaa e maɓɓe, ko ɗuum ɓuraynoo moƴƴannde ɓe. Allah ko kaforoowo, jurmotooɗo.

Eey mon yo ɓen gooŋɗinɓe ! Si faasiqiijo ardanii on e kumpital, tefee fii wota on keɓor e yimɓe sabu majjeede, ngonton nimsuɓe e kon ko mbaɗɗɗon.

Nganndee won'de Nulaaɗo Allah on hino hakkunde mon. Si o tewtino on e ko ɗuuɗi e fiyakuuji, on tampayno. Kono Allah yiɗini on gooŋɗinal, O suɗini ngal e ɓerɗe mon; O añini on ke'eferaaku, e faasiqaaku e jeddi. Ko ɓeen ngoni feewɓe ɓen,

ɗuum ko ɓural immorde ka Allah e neema. Allah ko gannduɗo, Ñeeñɗo.

Si peɗle ɗiɗi e gooŋɗinɓe ɓen haɓii, moƴƴintinee hakkunde maɓɓe. Si fedde goo bewii e hoore ndeya, ko kaɓugol won'de e bewude nden, haa nde ruttoo e yamiroore Allah nden. Si nde ruttike, moƴƴintiniree hakkunde maɓɓe nunɗal. Nunɗee, tawde pellet, Allah no yiɗi nuunɗooɓe ɓeen.

Nganndee gooŋɗinɓe ɓen ko jeyduɓe. Haray moƴƴinee hakkunde jeydal mon ngal, kulon Allah, mbelajo'o on njurminte.

Eey mon yo ɓen gooŋɗinɓe ! Wota yimɓe jalnor yimɓe : hino gasa hara ɓen (jalaaɓe) hino ɓuri ɓe moƴƴude. Wanaa rewɓe ngoni ko jalnorta rewɓe : hino gasa hara ɓeen no ɓuri ɓe moƴƴude. Wata on aybidnir ko'e-mon, wota on bugondir jammooje (bonɗe). Innde faasiqaaku nden bonii ɓaawo nde gooŋɗinal nden. Kala mo tuubaali, ko ɓeen ngoni tooñuɓe ɓen.

Eey mon yo ɓen gooŋɗinɓe ! Woɗɗitee e ko ɗuuɗi e sikke. Pellet, yoga e sikke ko bakkaatu. Wota on wiɗondir, wata yoga mon ño'u yoga. Hara gooto e mo'on njiɗay ñaamugol teewu musiɗɗo mum maayɗo? Hiɗon añi ɗum. Kulee Allah. Pellet, Allah ko Jaɓoowo tuubuubuyee, jurmotooɗo.

Eey mon yo yimɓe ! Min tagiriii on immorde e gorel e deyel, Min mbaɗiri on leƴƴi e gori, fii yo on anndindir. Pellet, ɓurɓe teddude e mon ɓen ka Allah, ko ɓurɓe gooŋɗude ɓen e mon. Pellet, Allah ko gannduɗo, kumpitiiɗo.

Yimɓe ladde ɓen mbi'i: "Min ngooŋɗinii". Maaku: "On ngooŋɗinaani taho. Mbii'ee kan : Min silmii. Gooŋɗinal ngal naataali taho ka ɓerɗe mon. Si on ɗoftike Allah e Nulaaɗo makko on, O ɗuytantaa on hu'unde e golle mon ɗeen". Pellet, Allah ko kaforoowo, jurmotooɗo.

Gooŋɗinɓe (tigi) ɓeen, ko ɓen gooŋɗinɓe Allah e Nulaaɗo makko on, refti ɓe cikkitaaki, ɓe tiiɗnori kadi jawle e pittaali maɓɓe ɗin fii laawol Allah ngol. Ko ɓen ngoni gooŋɗɓe ɓen.

Maaku: "Kere on nganndinay Allah diina mon kan, hara non Allah no anndi kala ko woni kammuuji e ka leydi?" Allah ko ganduɗo kala hu'unde.

Hiɓe mbaj Ma fii ɓe silmii. Maaku: "Wata on mbajitam silmugol mon. Si ko woni, ko Allah wajitata on fii O feewnirii on e gooŋɗinal, si wonii ko on gooŋɗuɓe".

Pellet, Allah no anndi wirniiɗi kammuuji ɗiin e leydi ndin. Allah ko deenɗo ko ngolloton kon.