The Noble Qur'an Encyclopedia

Joom yurmeende e on.

O anndinii alqur'aana.

O tagi neɗɗaŋke o.

O anndini mo ɓanngingol.(laɓɓin'gol)

Nayange ngen e lewru ndun [hiɗi ndogira] limoore,

koode ɗeen kadi e leɗɗe ɗeen, hino cujjude.

Kammu ngun, o toowni ngu. O waɗi nunɗal ngal,

fii wota on mbewu ka pe'esirɗe.

Ñinniron petgol ngol no nunɗiri. Wata on ustu pe'esirɗe ɗeen.

Leydi ndiin, O waɗanndi tagoore ndeen:

Muuyanteeɗi hino e mayri, e leɗɗe tamaro marɗe poƴƴi.

e gabbe marɗe ña'ande, e uurngol.

E ko holɗi e ne'emaaji Joomi mon ɗin woni ko njeddoton?

O tagiri neɗɗo on immorde e loopal, ba'ngal e ko juɗaa.

O tagiri jinnaaji ɗiin, immorde e lew lewndu yiite laaɓuki.

E ko holɗi e ne'emaaji Joomi mon ɗiin njeddoton?

Jeyɗo fuɗirɗe ɗeen ɗiɗi Jeyi kadi mutirɗe ɗeen ɗiɗi.

E ko holɗi e ne'emaaji Joomi mon ɗin njeddoton?

O Tuppindiri maaje ɗeen ɗiɗi, hiɗe potta.

heedo hino hakkunde majje, ɗe njillondirtaa.

E ko holɗi e ne'emaaji Joomi mon ɗin njeddoton?

Hino yalta e ɗeen [maaje] ɗiɗi: kaŋŋe "Lu'lu'u" e "marjaan".

E ko holɗi e neemaaji Joomi mon ɗin njeddoton?

Ko Kaŋko woodani dogooje lesaaɗe ka ndeer maayo, ba'aɗe na pelle.

E ko holɗi e ne'emaaji Joomi mon ɗin njeddoton?

Kala ko woni e hoore mayri ko ko re'oyta,

heddoo Jaati Joomaa Kiin, Jom mawngu e teddungal.

E ko holɗi e ne'emaaji Joomi mon ɗin njeddoton?

Ɓeen ngonɓe ka kammuuji e ka leydi hino naamnoo mo. Ñande woo, Himo e fiyaaku.

E ko holɗi e ne'emaaji Joomi mon ɗiin njeddoton?

Aray nde Min fa'andii hasbude on, onon yo tedda ko'e en ɗiɗo en..

E ko holɗi e ne'emaaji Joomi mon ɗin njeddoton?

Eey mon yo dental jinna e yimɓe ! Si on kattanii wuɗɗirgol ka seraaji kammuuji e ka leydi, haray nguɗɗee. On wuɗɗirtaa si wonaa e doole.

E ko holɗi e ne'emaaji Joomi mon ɗiin njeddoton?

Hino wurtee e mon - [onon jinna e yimɓe] - ɗemngal yiite e curki [maa sila taayuɗo], on paabondirtaa.

E ko holɗi e ne'emaaji Joomi mon ɗin njeddoton?

Si wonii kammu nguun seekiima, ngu wojjirii wa piindi hono pentiir boɗe.

E ko holɗi e ne'emaaji Joomi mon ɗin njeddoton?

Nden ñande, wonaa neɗɗo maa jinne woni ko laɓnditetee fii bakkaat mum.

E ko holɗi e ne'emaaji Joomi mon ɗin njeddoton?

Bonɓe ɓeen hino ngaannditiree Ma'andeeji maɓɓe ɗiin. Ɓe nanngiroyee ka njubuuji-tin tinɗi- e ka koyɗe.

E ko holɗi e ne'emaaji Joomi mon ɗin woni ko njeddoton?

Ko ngee woni Jahannama nge bonɓe ɓen njeddynoo fii mum.

Hiɓe mbanngoo hakkunde magge e fatayɗam kattuɗam wulde.

E ko holɗi e ne'emaaji Joomi mon ɗin njeddoton?

Hino woodani kala kulɗo daragol ye'eso Joomi mum, aljannaaji ɗiɗi;

E ko holɗi e ne'emaaji Joomi mon ɗin njeddoton?

(joomiraji)marɗe calɗi ɗiɗi dukke.

E ko holɗi e ne'emaaji Joomi mon ɗin njeddoton?

Ɓulli ɗiɗi hino e ndeer majji, ilayɗi.

E ko holɗi e neemaaji Joomi mon ɗin njeddoton?

Hino e ndeer majji kala muuyanteeɗi ɗiin, noone ɗiɗi.

E ko holɗi e neemaaji Joomi mon ɗin njeddoton?

Hara ko ɓe soɓɓindiiɓe e ndaɗɗule tekkirɗe ndeer, dimɗe majje ɗeen ɗiɗi ko ɓadiiɗe.

E ko holɗi e ne'emaaji Joomi mon ɗin njeddoton?

(Rewɓe) ɗaɓɓiɗa ndaarɗeɓe hino toon, ɓe neɗɗo memaani ado maɓɓe wonaa kadi jinna.

E ko holɗi e ne'emaaji Joomi mon ɗin njeddoton?

[Labiraaɓe] hono kaŋŋe yaaquutu e marjaan.

E ko holɗi e neemaaji Joomi mon ɗin njeddoton?

Hara njoɓdi moƴƴere no woodi, si wonaa moƴƴere?

E ko holɗi e ne'emaaji Joomi mon ɗiin njeddoton?

Hino ga ɗiin ɗiɗi, aljannaaji ɗiɗi kadi.

E ko holɗi e neemaaji Joomi mon ɗin njeddoton?

Kecciɗɗi ɗiɗi.

E ko holɗi e ne'emaaji Joomi mon ɗiin njeddoton?

Ɓulli ɗiɗi hino e ndeer majji, ɓulayɗi.

E ko holɗi e ne'emaaji Joomi mon ɗin njeddoton?

Hino e majji : muuyanteeɗi, e leɗɗe tamarooje e rummaana.

E ko holɗi e ne'emaaji Joomi mon ɗin njeddoton?

Hino e ɗiin ɗiɗi : rewɓe suɓaaɓe (labaaɓe).

E ko holɗi e ne'emaaji Joomi mon ɗin njeddoton?

huurul'ayniiɓe(yaaja gite), soomaaɓe e tillisooji,

E ko holɗi e ne'emaaji Joomi mon ɗin njeddoton?

neɗɗo memaani ɓen ado maɓɓe, wonaa kadi jinna.

E ko holɗi e neemaaji Joomi mon ɗin njeddoton?

Ko ɓe soɓɓindotooɓe e dow ngawluuji haakooji, e ndaɗɗule abqari labaaɗe.

E ko holɗi e ne'emaaji Joomi mon ɗin njeddoton?

Barkinii innde Jooma nden, Jom mawngu e teddungal !