The Noble Qur'an Encyclopedia

Nuun.[1] Mi wooɗndirii kuɗol e ko ɓe mbinndirta ko!

Aan a wonaa, sabu neema Joommaa o, kaangaaɗo.

Ko pellet, hino woodani-ma njoɓdi ndi taƴondirtaa.

E ko pellet, haɗa e jikku mawɗo.

Aray nde nji'aa, ɓe nji'a kamɓe kadi

ko hombo e mon woni kaangaaɗo oon.

Pellet, ko Joommaa ɓuri anndude majjuɗo on laawol makko ngol, ko Kaŋko kadi ɓuri anndude feewɓe ɓe.

Wota a tefto yeddooɓe ɓen.

Heɓe njiɗi si a newantono (ɓe), ɓe newano-(maa).

Wota a tefto kadi kala ɗuuɗuɗo woondugol, koyɗo.

ɗuuɗuɗo ño'ougol, ɗuuɗuɗo yaarugol baɗdi.

ɗuuɗuɗo kaɗgol moƴƴere, jaggitoowo, bakkodi'ɗo.

yo'ora-ɓerndeejo e hoore ɗum, keɓiraaɗo nii(.ɓiy jina).

fii o wonii joom jawdi e ɓiɗɓe.

Si aayeeje amen ɗeen janngaama e [tawnde] makko, o wi'a: "Ko tinndi adinooɓe".

Aray nde min maandina mo e hoore kinal.

Min njarribor ɓe wano Min njarribornoo jeyɓe ngesa mba : fewndo ɓeen ngooɗndunoo pellet, ɓe coñat ba subaka ko ɓe dawɓe.

ɓe itti tinaani [wi'ide] :"Si Allah jaɓii".

Jayngol immori ka Joomi maa ari huuɓiti ba tawi heɓe ɗaanii.

Ba wa'iti wa jemma ɓaleejo.

Ɓe noddindiri bimmbi oon :

"Kori ndawee ta ngesa mon, si tawii ko on soñooɓe".

Ɓe pokkiti heɓe ɗuumbo.

Won'de "miskiino woo naatataa e mabba hannde".

Ɓe ndawidi e ɗawugol [wa'asuɓe ɓeen] ko ɓe eɓɓuɓe.

Nde ɓe nji'unoo ba, ɓe mbi'i: "Pellet, min majjii [laawol ngol]".

wurin ko min ɗawaaɓe!".

Ɓurɗo ɓe moƴƴude oon wi'i: "mi wi'anaano on : haanii ko cubbunhinoɗon?"

Ɓe mb'i: "Senaare woodanii Joomi amen ! Pellet, hari ko min tooñɓe".

Woɗɓe e maɓɓe feewtiti ɓeya, heɓe pelindira.

Ɓe mbi'i: "Ee bone amen ! Pellet, hari ko min bewɓe.

Hino gasa ka Joomi amen wattitana min ɓuri baan ɗon moƴƴude. Ko ka Joomi amen ko min reerɗube e [ya'afeede] .

Ko noon tigi woni leɓte ɗeen; ko lette La'akara ɗeen non ɓuri manude, sinno heɓe nganndunoo !

Pellet, hino woodani gooŋɗuɓe ɓeen ka Joomi maɓɓe, Aljannaaji ne'ema.

Kere Min mbaɗay jebbiliiɓe ɓeen wano bonɓe ɓeen?

Ko heɓi on, si ɗon ñaawira noon?

Kaa hoɗon mari deftere, nde janngoton e mum?

Pellet, ko woodani on e mayre, ko ko cuɓotoɗon.

Ka ko podooje woodani on e amen, koolniiɗe haa Ñande Darngal, won'de pellet, hino woodani on ko ñaawoton kon?

Laɓndii ɓe ko hommbo e maɓɓe fawtaniiɓe ɗuum?

Kaa ko kafidiiɓe woodani ɓe? yoo ɓe ngaddu kafidiiɓe maɓɓe ɓen, si tawii ko ɓe gooŋuɓe !

Ñande belenru ñoroytee, ɓe noddee e cujjugol kono ɓe mbaawataa.

Hara gite maɓɓe ɗeen no heli, koyeera no suddi ɓe. Ko tawde ɓe noddeteno e cujjugol fewndo ka ɓe mbaawunoo...!

Accidam e kala jedduɗo ndee yeewtere; aray nde Min suynira ɓe nokku ka ɓe nganndaa.

Miɗo neeɓnan ɓe. Pellet noon, pewje am ɗen ko tiiɗɗe.

Kaa a laɓndi ɓe njoɓdi, hara ko yoɓugol ndi teddani ɓe?

Kaa ɓe nganndu fii wirniiɗi ɗiin, hara hiɓe mbinndira [ɗim hujjaaji maɓɓe]?

Muññor ñaawoore Joommaa nden, hara a wa'aali wa wonndiiɗo linngii ngii fewndo o noddunoo [Joom makko] homo sunii.

Si tawno moƴƴere immorde e Joomi makko hewtitanooki mo, ko pellet, o bugeteno e wulaa hara ko o pelniiɗo.

Joomi makko suɓii mo, o waɗi mo e moƴƴuɓe ɓeen.

Hay yedduɓe ɓeen eɓɓiinoo yuwirgol ma gite maɓɓe ɗeen, nde ɓe nanunoo Jaŋtoore nden, hiɓe mbi'a: "on ko kaangaaɗo!".

Ndee [Alqur’aanaare] wonaani, si wonaa waajo winndere nde!