The Noble Qur'an Encyclopedia
Towards providing reliable exegeses and translations of the meanings of the Noble Qur'an in the world languagesThose who set the ranks [As-Saaffat] - Moore Translation - Rowwad Translation Center
Surah Those who set the ranks [As-Saaffat] Ayah 182 Location Maccah Number 37
M wẽen ne Mɑlεgs tedgdbã, rulg-rulgã.
La sẽn tãsd-b Sɑwɑtã tãsg tεkẽ n peegd-b n teesd Wẽnd sẽn tʋllẽ.
La sẽn karemd-b Tẽegrã sẽn yɑɑ Wẽnd goɑmã.
Ad yãmb Soabã, a yaa A Yembre.
Saas la Tẽng la bũmb ning sẽn be b yiibã sʋk Soaba, la wĩntoog pukr zĩis Naaba.
Ad Tond nagsa Dũni saagã ne faas-teed sẽn yaa ãdse.
La D leb n gũus-a n yi Sʋɩtãan fãa sẽn yaa tõta.
B pa tõe n kelg yĩngr rãmbã ye, b lobd-b-la wεεng fãa gilli.
Tɩ yaa rigb ne sʋɩtãambã, la b le tar nang sẽn ruumdi.
Rẽnda ned ning sẽn zaeeg-a zaeegr tɩ vɩleng sẽn wit pʋgl-a.
Bɩ f sok-b n gese, bãmb naanegã toolem n yɩɩd bɩ yaa bũmb ning Tõnd sẽn naanã? Ad Tõnd naan-b lame ne tãnd sẽn yaa tabende.
Pa woto ye, fo maanda yel-solemd tɩ bãmb yaandẽ.
La b sã n tẽeg-ba, b pa tẽegd ye.
La b sã n yã yel-solemde, la b sẽn boond taab n yaandẽ.
La b yeel yã: "yãoã pa yɩ rẽnda tɩɩm sẽn vẽnege".
B yeelame: "rẽ yĩnga tõnd sã n ki n lebg tom la kõaba, b na leb n vʋʋg tõndo tɩ d yɩ nɑɑn-pɑɑlle?
La tõnd saam-rẽemsã fãa?"
Yeele: "n-ye". Tɩ yãmb yaa b sẽn faag-b rãmba.
Ad a yaa tãs-vuk bal tɩ bãmb yaa sẽn gete.
Tɩ b yeele: "yaa tõnd wɩɩbdo! Yãwã yaa rolbã raare.
Yãoã yaa welgr raar ning yãmb sẽn da yɩ n yagsdẽ wã".
Tigim-y b rãmb nins sẽn wẽgbã la b wõnes-n-taasã la bũmb nins b sẽn da yɩ n tũudẽ wã.
Zẽng tɩ pa Wẽndã, bɩ y kãag-y-b n tʋg Bugmã sorẽ.
La y yals-y-ba, tɩ b na n sok-b lame.
Yaa bõe n tar yãmb tɩ y pa sõngd taaba?.
Pa woto ye, bãmbã rũnda, b yaa sak-n-tũ rãmba.
Tɩ b sãnda togl sãnda n sogsd taaba.
N yetẽ: "ad yãmb ra yɩɩme n wat tõnd nengẽ ne pãnga".
Tɩ b yeele: "yãmb pʋs n ra pa yɩ n yaa sɩd-kõtb ye".
La tõnd ra pa tar pãng yãmb zug ye, yãmb pʋs n ra yɩɩ neb sẽn yaa kεdgdba.
Tõnd Soabã gomd sɩdga tõnd zugu, ad tõnd yaa (naongã) lεmbdba.
Tɩ tõnd kedg yãmba, ad tõnd yɩɩme n yaa kεdgdba.
La raar-kãngã, b fãa yaa lagem-n-taas naongã pʋga.
Ad tõnd yaa woto bal la D tʋm ne nin-wẽnsã.
Ad bãmb ra yɩɩme tɩ b sã n yeel-ba: "soab kae sã n pa Wẽnde". La b sẽn maand waoog-m-menga.
La b yetẽ: "rẽ yĩnga tõnd yaa d soben-dãmbã basdba, yɩɩn-yɩɩnd sẽn yaa gãeeng yĩnga?".
Pa woto dɛ! A waa ne sɩd la a sɩdg tẽn-tʋʋmbã.
Ad yãmb yaa naon-zabdgã lεmbdba.
La b pa rond yãmb rẽnda yãmb sẽn ra yɩ n tʋmdẽ wã.
Rẽnda Wẽnd yembs nins b sẽn tɩlgã.
Bãmb n tar rɩtl b sẽn mi.
Sẽn yaa tɩ-biisi, tɩ bãmb yaa b sẽn waoog-b rãmba.
Tɩ b be Neema arzãn-rãmbã pʋsẽ.
N be gãt zutu, n togl taaba.
Tɩ b gilgd b zut ne ko-tees sẽn yɑɑ yolgemd wɑlɑ ko-nifri.
Pεεlg faddd n yaa noog ne a yũudba.
Suub kɑ ɑ pʋgẽ ye, ɑ pa zɑbd b zutu.
La b tara pagb sẽn yaa ges-koees rãmba, n yaa pʋg-neeb nin sẽn yalme.
B yaa wala gεl b sẽn gũusi.
Tɩ b sãnda togl sãnda n sogsd taaba.
Yεt n yeel b pʋgẽ wã : "ad mam ra tara zaoa.
T'a ra yetẽ: "rẽ yĩnga fo lagma sɩd-kõtbã bɩ?''.
Tõnd sã n ki n lebg tom la kõaba rẽ yĩnga tõnd yaa b sẽn na n rol-b rãmb bɩ?"
Tɩ sɩd-kõtã yeel tũud-n-tɑɑsã sẽn be ɑrzãnɑ: "rẽ yĩnga yãmb pɑ na n wa tɩ d lik n ges ɑ sẽn mɑɑnegɑ?"
T'a lɩk n yã-a Bugmã sʋka.
T'a yeele: "m wẽen ne Wẽnde, fo ra na n halka maam,
La sã n ka mam Soabã neema wã yĩngã, m ra na n zĩnda b sẽn wa ne-b rãmb Bugmẽ wã.
M mi tɩ tõnd ɑ ɑrzãn koɑmb pa kiidb lɑ?.
Rẽnda d kũ-rãeengã? Tõnd pa b sẽn na n nams-b rãmb me ye?.
Ad woto la pʋɩ-bedre.
Bɩ tʋmdbã tʋme, woto bilgr paoong yĩnga.
Señ togs tɩ loogã, yẽ la sigb zĩig sõama sẽn yɩɩd bɩ yaa zakʋʋm tɩɩgã (tʋk sẽnego) ?.
Tõnd naan-a lame t'a yaa zarbg-n-gεsg ne wẽgdbã.
Ad a yaa tɩɩg sẽn yit Bugmã yẽgrẽ.
A bĩisã yaa wala Sʋɩtãams zutu.
La bãmb na n rɩ-a lame n pids-a b pʋsã.
Rẽ poorẽ b tara bõn-yũudi sẽn gẽdg ne ko-tʋʋlg n na n paas a zugu.
Rẽ poorẽ ad b lɛbeng zĩig yaa Bugmẽ wã.
Ad bãmb mika b saam-dãmbã tɩ b yaa menemdba.
Tɩ bãmb yaa sẽn zoet n wurd b vũunã tũub zugu.
La sɩd la hakɩɩka rãeenem rãmbã wʋsg sẽn reng bãamb taoor menmame.
La sɩd la hakɩɩka Tõnd tʋmsa bugsdb b pʋgẽ.
Bɩ f ges b sẽn bugs-b rãmbã baasg yɩɩ wãn-wãna?
Rẽnda Wẽnd yembs nins b sẽn tɩlgã, (bãmb nɑ n põsɑ nɑngã).
La sɩd la hakɩɩka a Nuuh boola Tõndo, la sakdb sɑkr sẽn be neer n yɩɩd yaa Tõndo.
La D tɩlg-a-la ne a zakã rãmb n yi nan-bedrã.
La D maan a koambã tɩ bãmb la kεlldba.
La D bas tɩ b na n wa gomd a yell yaoolem rãmbẽ wã.
Tɩlgr be ne a Nuuh bõn-naandsã pʋga.
Ad yaa woto bal la Tõnd rond manegdbã.
Ad a yaa Tõnd yembs nins sẽn yaa sɩd-kõtbã a yembre.
Rẽ loogr poorẽ tɩ Tõnd na n bõr neb a taabã.
La sẽn be a sõngdbã pʋgẽ, yaa a ɭbraahɩɩm.
Wakat ning a sẽn wa a Soabã nengẽ ne sũur sẽn yɩlge.
Wakat ning a sẽn wa n yeel a saambã la a zãma wã: "yaa bõe la yãmb sẽn tũudã?"
Zĩri soben-dãmb zẽng sẽn pa Wẽnd la yãmb rata?
La yãmb tẽeda wãn-wãn ne bõn-nãandsã Soabã, tɩ sã n sεgɑ ne lɑgm-n-tɑɑre?
T'a nak n ges ãdsẽ wã.
N yeel-bɑ: "ad mam yaa bãada".
Tɩ b ball n yi-a n gũd b kuidsi n looge.
T'a zãoos n kẽng b soben-dãmbẽ wã, n yeel: "yãmb pa rɩt laa?''.
Bõe n tar yãmb tɩ y pa gomda?"
T'a loog n ta n pãbd-b ne rɩtgo.
Tɩ b togl n wat a nengẽ ne yãgbo.
T'a yeele: "yãmb tũuda bũmb ning yãmb sẽn peesdã''
Tɩ Wẽnd n yaool n naan yãmb ne bũmb ning yãmb sẽn tʋmdã?
Lɑ b yeel yã: "me-y wulg a yĩngɑ, n lobg-a bugmã pʋga".
Tɩ b tʋls-a ne wẽnga tɩ Tõnd maan tɩ bãmb lɑ bõnɑ rãmba.
T'a yeele: "ad mam yaa loogda n tʋg m Soabẽ nengẽ, A na n kãndga maam''.
Foom m Soabã! Kõ maam bi-sõngo.
Tɩ Tõnd noog a sũuri ne bi-ribl (ɭsmaa-ɩɩl) sẽn yaa sugr soaba.
Lɑ ɑ sẽn wa n bɩ, n ta sõng ɑ sãɑmbã n tʋm wakatã, a (ɭbraahɩɩm) yeelame: "m biig sõngo, ad mam yãta gõeem pʋgẽ n kodgd foom, bɩ f gese fo tagsg yaa wãn-wãna?" T'a yeele: yaa m baaba sõngo, maan b sẽn sagend foomã tɩ Wẽnd sã n sake, f na n mika maam tɩ m lagma sugr rãmbẽ".
B yiibã fãa sẽn wa n sak n reeg b zugẽ, t'a gãneg-a a yεgdgẽ wã.
Tɩ Tõnd boaal-a: "yaa foom ɭbrahɩɩma!''
Sɩd la hakɩɩka fo sɩdga zãmsdã", yaa woto bal la Tõnd rond manegdbã.
Ad wãnda la zarb-n-gɛsg sẽn vẽnege.
La Tõnd tεdg-a lame ne bõn-koadgdg sẽn bedme.
La D bas tɩ b na n gomd a yʋ-noogo yaoolem rãmbẽ wã.
Tɩlgr be a ɭbraahɩɩm yĩnga.
Yaa woto bal la tõnd rond manegdbã.
Ad a yaa Tõnd yembs nins sẽn yaa sɩd-kõtbã a yembre.
La D noog a sũur ne a ɭshaaka t'a yaa nabiyaam n yi nin-sõmsẽ wã.
La D bark-a (ɭsmaa-ɩɩl) la a ɭshaaka. Be b yiibã koamb pʋsẽ, manegd la wẽg-m-meng soab sẽn vẽnege.
La sɩd la hakɩɩka Tõnd maana neema a Musa ne a Harʋʋn zugu.
La D tɩlg b yiibã la b yiibã neb n yi nan-bedrã.
La D sõng-b tɩ b yɩ n yaa bãmb la windba.
La D kõ b yiibã gaf-vẽenega.
La D kãndg b yiibã n tʋg so-tɩrga.
La D bas tɩ b na wa gomd b yiibã yʋ-noogo yaoolem rãmbẽ wã.
Tɩlgr be a Musa ne a Harʋʋn yĩnga.
Ad yaa woto bal la Tõnd rond manegdbã.
Ad b yiibã bee Tõnd yembs nins sẽn yaa sɩd-kõtbã pʋgẽ.
La sɩd la hakɩɩka a ɭlyaas bee tẽn-tʋʋmbã pʋgẽ.
Wakat ning a sẽn wa n yeel a nebã: "yãmb pa zoet Wẽnde?.
Yãmb tũuda a Baal (rʋbga) la y basd Naand sẽn yɩɩd a ne sõmblem,
Sẽn yaa Wẽndã, yãmb Soabã la yãmb baab-rãeemsã Soabã?
Tɩ b yags-a. Ad bãmba yaa b sẽn na n wa ne b rãmba ( bugmẽ wã).
Rẽnda Wẽnd yembs nins b sẽn tɩlgã.
La D bas tɩ b na n wa gomd a yʋ-noogo yaoolem rãmbẽ wã.
Tɩlgr be ne a ɭlyaasɩɩn yĩnga.
Ad yaa woto bal la Tõnd rond manegdbã.
Ad a yaa Tõnd yembs nins sẽn yaa sɩd-kõtbã a yembre.
La sɩd la hakɩɩka a Lʋʋt bee tẽn-tʋʋmbã pʋga.
Wakat ning Tõnd sẽn wa n tɩlg-a ne a zakã rãmb gilli.
Rẽnda pʋg-yãang n pa halkrã pʋgẽ.
Rẽ loogr poorẽ tɩ Tõnd na n halk sẽn ketbã.
La sɩd la hakɩɩka yãmb pɩʋʋgd-b-la yibeoogo.
La yʋngo, yãmb pa tar yam la?
Sɩd la hakɩɩka a Yuunus bee tẽn-tʋʋmbã pʋga.
Wakat ning a sẽn wa n zoe n kẽng kogl pitgã pʋga.
Tɩ b maan poeere, t'a zĩnd b sẽn wil-b rãmbã pʋgẽ, (tɩ b lo-bɑ mogrẽ wã).
Tɩ zĩifã vel-a, tɩ yẽ yaa b sẽn sãbs a soaba.
La tɩ sã n pa a sẽn yɩ n lagem sẽn yɩlgd-b Wẽnd yʋʋrã.
A naan n zĩndẽ a pʋgẽ wã n tãag b sẽn na n yik-b raarã.
Tɩ Tõnd lob-a weo-raoogẽ wã t'a yaa bãada.
La Tõnd buls tɩɩg a yĩnga, tɩɩg sẽn tão Tẽnga.
La D tʋms-a neb tus-koabg nengẽ pʋs n yɩɩdɑ rẽ.
Tɩ b kõ sɩda, tɩ Tõnd wʋms-b noog n tʋg wakato.
Bɩ f sok-b n gese, fo Soabã n so kom-pugli wã tɩ bãmb n so kom-ribli wã?
Bɩ Tõnd naana Malεgsã tɩ yaa pagba, tɩ bãmb yɩ kaset rãmbã?
Yaa sɩda, ad bãmbã, b zĩri wã yĩnga b yetame:
"Wẽnd rogame". La sɩd la hakɩɩka ad b yaa pʋ-yagdba.
Rẽ yĩnga kom-pigli la A tũus n bas kom-ribli?
Yaa bõe n tar yãmb tɩ y bʋʋd woto?
Yãmb pa tagsd la?
Bɩ yãmb tara daliil sẽn yɑɑ vẽenega?.
Bɩ y wa ne y gafã, tɩ y sã n da n yɩɩme n yaa sɩd rãmba.
La b maan rogem n ning Yẽnda ne Malεgsã sʋka. La sɩd la hakɩɩka malεgsã bãngame tɩ ad Wẽnd nɑ n wɑɑ ne lɑgm-n-tɑɑrɑ rãmba n geel-bɑ.
Yɩlgemd be ne Wẽnde n yi bũmb ning b sẽn bilgdã.
Rẽnda Wẽnd yembs nins b sẽn tɩlgã.
Ad yãmba, la bũmb ning yãmb sẽn tũudã.
Yãmb pa yɩ n tõe menemes ned n yi sɩdɑ sor ye,
Rẽnda ned ning sẽn yaa Bugmã kẽeda.
La malεk baa a ye pa be tõnd sʋka rẽndame t'a tara yalsg zĩig b sẽn mi.
La sɩd la haɩɩka Tõnd la tεdgdba, (Wẽnd tũubɑ pʋgẽ).
La sɩd la hakɩɩka Tõnd la yɩlgdba.
La b ra yɩɩme n yetẽ:
"Tõnd sã n da tarẽ tẽegr sẽn yi rẽenem rãmbẽ wã.
D rag n na yɩ Wẽnd yembs nins b sẽn tɩlgã".
Tɩ b kɩfl ne-a, la b na wa n bãnge.
La sɩd la hakɩɩka Tõnd gomd rag n reng a taoore, Tõnd yembs nins sẽn yaa tẽn-tʋʋmbã yĩnga.
Tɩ ad yaa bãmb n na n paam sõngrã.
La ad Tõnd tãp-biisã (sodaasã) bãmb la windbã.
Bɩ f ball n yi-ba n tʋg n tãag wakato.
La f koll-b tɩ b na wa n yã.
Paa Tõnd naongã la b yãgd n baoodẽ lɑ?
La a sã n wa sig b samandẽ wã, b sẽn bugs-b rãmb yibeoog yɩ wẽnga.
Bɩ f ball n yi-b n tʋg n tãag wakato.
La f koall-b tɩ b na wa n yã.
Fo Soabã yɩlgame, sẽn yaa zɩslem Soabã n yi bũmb ninga b sẽn bilgdã.
La tɩlgr be ne tẽn-tʋʋmbã.
La pẽgr be ne Wẽnd sẽn yaa bõn-naandsã Soabã.