The Noble Qur'an Encyclopedia
Towards providing reliable exegeses and translations of the meanings of the Noble Qur'an in the world languagesSad [Sad] - Moore Translation - Rowwad Translation Center
Surah Sad [Sad] Ayah 88 Location Maccah Number 38
Ṣaad,[1] m wẽen ne Alkʋrãanã sẽn yaa tẽegrã, (ɑd yellã pɑ wɑlɑ kɩfr-dãmbã sẽn tẽed tɩ lɑgm-n-tɑɑse n be ne Wẽndã ye).
Pa woto ye! Sẽn kɩfl-bã bee waoog-m-meng la yõs-taab pʋga.
Zãmaan-rãmb sõor waoog Tõnd sẽn halk sẽn reng bãmb taoore, tɩ b moon n boole, la pa le yɑɑ põsg wakat ye.
La b (Mak rãmba) maan yel-solemd ne bugsd sẽn n wa bãmb nengẽ, n yi bãmb pʋgẽ, tɩ kɩfr-dãmba yeele: "yãoã yaa tɩɩm soaba, n yaa pʋ-yagda",
A maana soaben-dãmbã tɩ lebg soab a yembre? Ad yãoã yaa yell sẽn yaa yel-solemd tεkẽ".
Tɩ b zu-raadã yi n yeele: "kell-y n kẽng bala, la y maan sugr ne y soaben-dãmbã, ad yãoã yaa yell b sẽn rat n yõk yãmb ne-a n wil yã,
Tõnd pa wʋm yãwã diin-rãmbɑ tɑɑbã pʋgẽ ye, yãoã yaa yel-nangdɩ",
Yẽ zug la b sik tẽegrã (Alkʋrãanã) tõnd sʋka?" Pa woto ye, b bee sãmbs pʋgẽ ne Mam tẽegrã. Pa woto ye, b na n pa lemb Mam naongã ye.
Bɩ fo Soabã yoslgã baoã bee bãmb nengẽ, sẽn yaa wilb Naabã, n yaa Kõtã?.
Bɩ bãmb soo saas la Tẽng naam la bũmb ning sẽn be bãmb b yiibã sʋkã? Bɩ b rʋ a nengẽ ne b sẽn tõe sor ning fãa.
Bambã yaa tãp sẽn kong pãngɑ wɑlɑ sulã rãmbã sẽn reng tɑoor n kɩɩsã sẽn kong pãng tɩ b tõog-ba.
Taoor tɩ bãmb na n pa wa, a Nuuh nebã la a ʿAade, la a Fɩr-ʿaoon sẽn yaa bayã soabã yagsame.
La a Samuud, la a Lʋʋt nebã, la tɩɩsã rãmb (A sʋ'ayb nebã) me yagsame, bãmbã la sula rãmba,
Bãmb yembr fãa pa yɩ rẽndame t'a yagsa tẽn-tʋʋmbã, tɩ Mam naongã sɩdg b zugu.
La bãmbã pa gũudi, rẽnda kaas-vuk bala, sẽn pa tar yɩlenga.
La b yeel yã: "yaa tõnd Soaba! Kõ tõnd d pʋɩɩrã (nɑngã) tao-tao tɩ Geelgã Raar na n pa ta ye".
Maan sugr ne b sẽn yetã, la f tẽeg Tõnd yamb a Daawʋʋd sẽn yaa pãngã soabã, ad a yaa lebs-m-meng soaba.
Tõnd noma tãmsã tɩ b lagem-a n yɩlgd Wẽnd zaabr la yibeoogo.
Tɩ liuuli wã yaa sẽn tigmi, b fãa gill yaa sẽn lebs b mens Wẽnd nengẽ n pʋgd a Daawʋʋda.
La Tõnd kenga a naamã, la D kõ-a bʋʋd-minim la goam welgre.
La zabd-n-taasã kibar waa fo nengẽ bɩ? Wakat ning b sẽn wa n kal ɑ tũudmã zĩig lalgã n kẽ wã.
N kẽ a Daawʋʋd nengẽ, t'a yεεse, tɩ b yeele: "ra yεεs ye, tõnd yaa zabd-n-taas a yiibu, tõnd ned ɑ yembr n wẽg a to. Bɩ f bʋ tõnd sʋk ne sɩd la f ra maan n zʋʋg ye. Kãndg tõnd n tʋg sor-tɩrga.
Ad yãoã yaa mam saam-biiga, a tara pe-yãams pis-wae la a wae, tɩ mam tar pe-yãang a ye, la a yeel yã: "kõ-a maam tɩ m loke" . La a wila maam goamã pʋgẽ.
T'a (Dawʋʋd) yeele: "sɩd la hakɩɩka a wẽga foom ne a sẽn kos fo pe-yãangã n na paas a pe-yãamsã, la tʋmd-n-taarã rãmb wʋsg fãa, sãndã wẽgda sãndã, rẽnda rãmb nins sẽn kõ sɩd la tʋmd sẽn sõmbã, la bãmb paooda". La a Dawʋʋd bãngame tɩ Tõnd zarb-a lame n na n gese yel-kãngɑ pʋgẽ, t'a kos yaafa ne a Soabã, n lʋɩ n maan suguud n lebs a meng Wẽnd nengẽ.
Tɩ Tõnd yaaf-a, rẽnd a tara zĩig sẽn zẽk Tõnd nengẽ la lεbeng zĩig sẽn be neere.
Yaa foom Dawʋʋda, Tõnd ninga foom tɩ f yaa lεdsd Tẽng zugu, bɩ f bʋ neba ne taab sʋk ne sɩda, la f ra tũ f yõor yamleoog t'a wa menems foom n yi Wẽnd sorã zug ye. Ad neb nins sẽn menemd n yit Wẽnd sorã, b tara naong sẽn keeme b sẽn yĩm Geelgã Raarã yĩngɑ.
La Tõnd pa naan saagã ne Tẽngã la bũmb ning sẽn be b yiibã sʋkã zaalem yĩng ye, woto la sẽn kɩfl-bã tẽeda, la wɩɩbd be ne neb nins sẽn kɩflã sẽn yɑɑ Bugum.
Tõnd na maan sẽn kõ-b sɩd la b tʋm sẽn sõmbã wala sãamdbã Tẽngã zugã sɩda? Bɩ Tõnd na maan Wẽn-zoetbã wala nin-wẽnsã?.
Yãoã yaa bark gafo tɩ Tõnd sik-a fo nengẽ, bʋɩl yĩng tɩ b na tags n ges a Aaya-rãmbã, la sẽn na yɩlẽ tɩ yam-bεεl rãmbã tẽege.
La Tõnd kõo a Dawʋʋd a Sʋlaymaan, ad yaa yamb-sõng tεkẽ! A yɩɩ n yaa lebs-m-meng soaba.
Wakat ning b sẽn wa n tedg a nengẽ wed-zoets sẽn be neere, zaabr sasa.
T'a yeele: "mam bʋʋ wiidi (gihɑɑdi wiidi wã) nonglem n yɩɩd m Soabã yʋʋr tẽegr hal tɩ wĩntoogã wa tʋg n lʋɩ.
Lebs-y-b mam nengẽ, t'a kεεd b karsã la b yubli wã.
Sɩd la hakɩɩka Tõnd zarba a Sʋlaymaan n na n gese, n lobg sʋɩtãɑn a zaoorẽ wã, t'ɑ mɑɑn ɑ mengã wɑlɑ neda; n tɑll nɑɑmɑ wɑkɑt bilfu, rẽ poorẽ tɩ nɑɑmɑ lebg n wɑ ɑ nengẽ, tɩ Wẽnd kõ-ɑ pãng zĩn-dãmbã zugu.
A yeelame: "yaa m Soaba! Yaaf-ma, la f kõ-m naam sẽn pa sõmb ne ned baa a ye mam poorẽ ye, ad Foom la kũun Naaba".
Tɩ Tõnd nom sebgã n kõ-a t'a zoet bʋg-bʋg ne a sagelle, a sẽn rat zĩig ning fãa.
La Sʋɩtãambã, tɩ b yaa metb la yẽedba.
Tɩ sãnda sẽn wεgbã, bãmb yaa sẽn sẽb tɩ b lagem taab bãensã pʋgẽ.
Wãndã yaa Tõnd kũuni, bɩ f kõ maa f gãde, tɩ geelg ka be ye.
La a tara zĩig sẽn zẽk Tõnd nengẽ la lεbeng zĩig sẽn be neere.
La f tẽeg Tõnd yamb a Ayyʋʋb yelle, wakat ning a sẽn wa n bool a Soabã n yeele: ''A Sʋɩtãan bolga maam ne yaams la nango''.
"Tĩng ne f naoorã, tɩ wãndã yaa ko-soodem sẽn maas la ko-yũudum".
Tɩ Tõnd kõ-a a nebã, la b buud n lagem-ba, tɩ yaa yolsg sẽn yi Tõnd nengẽ la tags-n-gesg ne yam-bεεl rãmba.
(A sẽn wɑ zɑb ne ɑ pɑgã n wẽen t'ɑ nɑ pã-bɑ sãbg koɑbgã, Tõnd yeel-ɑ lɑme): Yãk mo-kill ne f nugã n pãb ne-a la f ra yidg f wẽenegã ye, lɑ Tõnd mik-a lame t'a yaa sugr soaba, ad yaa yamb-sõng tεkẽ, a ra yɩɩme n yaa lebs-m-meng soaba.
La tẽeg Tõnd yembsã a ɭbraahɩɩm la a Ishaaka, la a Yaakuub yelle, sẽn yaa pãng rãmb la pʋtẽer rãmba.
Tõnd welg-b lame ne laahrã tẽegr bala.
La ad Tõnd nengẽ, b bee b sẽn tũus-b rãmbẽ wã sẽn yaa nin-tũusdbã.
La f tẽeg a ɭsmaa-ɩɩl yelle, la a Ya-sa'ɑ, la a Zʋlkɩfle, b gillã bee nin-tũusdẽ wã.
Yãoã yaa tẽegre, la ad wẽn-zoetbã tara lεbeng zĩig sẽn be neere.
Arzãn ruumds pʋgẽ, tɩ ragnoyã yaa sẽn pak bãmb yĩnga.
Tɩ b kɩll a pʋgẽ n boond (tɩ b kõ-b b yam) tɩ-biis wʋsgo, la bõn-yũudi.
B tara ges-koees rãmba, pʋg-neeb sẽn yaa reem-n-taase.
Woto la b pʋlem-ba, Geelgã Raare.
Wãndã yaa tõnd rɩtla, pa tar saab ye.
Yaa woto, la kεdgdbã me tara lεbeng zĩig sẽn yaa wẽnga.
Gεhannem tɩ b kẽed-a; gãag zĩig yɩ wẽnga.
Sã n yaa woto, bɩ b lemb-a, ko-kaeedg la nod-meto.
La nang kõbg toor-toor sẽn leb n wõnd woto.
Woto yaa zãma sẽn na n sẽdg n kẽ n lagem yãmba, beelg pa be ne-b ye, ad b yaa Bugmã kẽedba.
(Tɩ kɩfr-dãmb ne taab) yeele: "yãmb zĩig n pa be neer kae, yãmb n kẽes tõnd a pʋgẽ, rẽnd tablg zĩig yɩ wẽnga".
b yeele: "yaa tõnd Soabã! Ned ning sẽn yaa sabab n wa ne tõnd kaanẽ wã, bɩ F rogl-a nang n paas Bugmã pʋgẽ".
La b yeele: "yaa bõe tɩ tõnd pa ne roap tõnd sẽn da yɩ n tẽed tɩ b yaa nin-wẽnse?''
Tõnd rɩk-b-la ne yaalg bɩ yaa d ninã n pa ne-ba?"
Ad Bugum koambã zab-taabã woto wã yaa sɩd tɩ sik kɑ be ye.
Yeele: "ad mam yaa bugsda, la soab buud kae rẽnda Wẽnde, sẽn yaa Soab-Yεnga, n yaa Modgr Naaba"
Saas la Tẽng Soaba, la bũmb ning sẽn be b yiibã sʋka, n yaa wilb Naaba, n yaa Yaafg Naaba.
Yeele: "ad a yaa kiba-bedre,
Tɩ yãmb yaa balldb n yit-a.
Mam ra pa tar baa bãngr ne yĩngr zãmã wã wakat ning b sẽn wa n takd taabã ye.
B pa tʋms tɩ wa mam nengẽ, rẽndame tɩ mam yaa bugsd sẽn vẽnege.
Wakat ning fo Soabã sẽn wa n yeel Malεgsã: "Mam na n naana ninsɑɑlɑ, ne tãndo,
La M sã n wa maneg-a la M fʋʋs a pʋgẽ wã Mam Vɩɩmã, bɩ y lʋɩ n maan-a suguudu".
Tɩ malεgsã fãa gill maan-a suguudu.
Rẽnda a ɭblɩɩs sẽn waoog a menga, n lagem kɩfr-rãmbã.
A yeele: "yaa foo a ɭblɩɩsa! Bõe n gɩdg foo tɩ f maan Suguud ne bũmb ning Mam sẽn naan ne M Nus a yiibã, f waooga f meng bɩ f yɩɩme n be zẽk-m-meng rãmbẽ wã?"
A (ɭblɩɩs) yeele: "mam são-a lame, Fo naana maam ne bugum, la F naan yẽ ne tãndo".
T'A (Wẽnd) yeele: " bɩ f yi [azrãnã pʋga] bala fo yaa b sẽn rig n zãag yolsgo!
La ad mam kãabg be fo zug n tãag Rolbã Raare".
T'a yeele: "yaa m Soaba! Koll maam n tɩ tãag raar ning b sẽn nɑ n nek nebã"
Tɩ [Wẽnd] yeele: "ad fo naaga b sẽn na n koll-b rãmbã.
Hal n tɩ ta raar Wẽnd sẽn mi.
T'a (ɭblɩɩs) yeele: "m wẽen ne Fo zɩslemã, la tɩ m na raag-ba, b gilli,
Sã n pa Fo yembs nins sẽn yaa pʋ-peelem rãmbã".
T'A (Wẽnd) yeele: "yaa sɩda!M yɑɑ Sɩd-Nɑɑbɑ la yaa sɩd bal la Mam yetã,
La tɩ M na pids Gεhannemã neer-neer ne foom la neb nins sẽn pʋg foomã gilli.
Yeele: "mam pa kot yãmb keoor a zug ye; la m pa yɩ me n yaa rogl-m-mens rãmb b sẽn pa tõe ye".
A (Alkʋrãanã) pa yɩ rẽnda tẽegr ne bõn-naandsã.
La lak tɩ y na bãng Alkʋrãɑnɑ kibarã wakat bilf poorẽ bala.