The Noble Qur'an Encyclopedia
Towards providing reliable exegeses and translations of the meanings of the Noble Qur'an in the world languagesThe Troops [Az-Zumar] - Moore Translation - Rowwad Translation Center
Surah The Troops [Az-Zumar] Ayah 75 Location Maccah Number 39
Gafã sigbã yii Wẽnd nengẽ sẽn yaa wilb Naabã n yaa Bʋʋd-Mitã.
Tõnd sika Gafã n tʋg fo nengẽ ne sɩda, bɩ f tũ Wẽnd tɩ f yaa sẽn yɩlg dĩinã ne-A.
Pa Wẽnd la dĩin yɩleng Soab sɩda? La neb nins sẽn gãd lall-n-taas tɩ pa yɩ ne-A wã yetame: "tõnd pa tũud-b rẽnda b na tall tõnd n pẽneg Wẽnde, pẽnegr sẽn yɩɩde". Ad Wẽnd bʋʋda bãmb ne taab sʋka, bũmb ning pʋgẽ bãmb sẽn yõs taabã. Ad Wẽnd pa kãndgd ned ning sẽn yaa zĩri-be-ned n yaa kɩfr ye.
La tɩ Wẽnd sã n da rat n na n yãk biiga, a na tũusẽ a sẽn naandã pʋgẽ A sẽn rate, yɩlgr be ne-A, Yẽnda la Wẽnd sẽn yaa Yembrã n yaa Modgdã.
A naana saasã la Tẽngã ne sɩda, A kẽesda yʋngã wĩndgã pʋgẽ, la a kẽesd wĩndgã yʋngã pʋgẽ, la A nom wĩntoogã ne kiuugã, b yembr kam fãa zoetame n na n tãag wakat sẽn yãk raare, ad Yẽnda la wilb Naab n yaa Yaafda.
A naana yãmb n yi yõ-yεng pʋgẽ, rẽ poorẽ n naan a pʋgẽ a pagã, la A sik kõbg a nĩi n kõ yãmba rũmsẽ wã. A naanda yãmb y ma-rãmbã pʋsẽ, naaneg toor-toor ligs a tãab pʋgẽ. Yãmb Wẽnd-kãng la yãmb Soabã, Yẽ n so naamã, soab kae tɩ pa Yẽ ye; la yaa wãn tɩ b gõdg yãmba?
Yãmb sã n kɩfle, ad Wẽnd sεk A Meng n yi yãmba, la A pa yard kɩflmã ne A yembsã ye. Y sã n pʋʋs barka, A yard-ɑ-lɑ ne-yã. Zɩ-tʋkd fãa pa na n tʋk a to zɩɩb ye. Rẽ poorẽ yãmb lεbeng zĩig yaa y Soabẽ wã t'A kõ yã bũmb ning y sẽn da yɩ n tʋmdẽ wã kibare, ad A yaa Mit ne sẽn be yãadẽ.
La keelem sã n paam ninsaala, a boonda a Soabã t'a yaa sẽn lebs a mengã A nengẽ, rẽ poorẽ A sã n lebg n kõ-a neema sẽn yi A nengẽ (Wẽnd) a yĩmda bũmb ning a sẽn da yɩ boond pĩndã. La a maan wõnesem-taas ne Wẽnd sẽn na yɩl n menes (nebã) n yi A sorã, yeele: "wʋm noog ne f kɩfendã bilf bal tɩ ad fo yaa Bugum neda".
La ned ning sẽn yãs ne tũudum yʋng wakatse n yaa suguud maanda, n yaa yasda, n yaeesd laahrã la a tẽed a Soabã yolsgo, yeele: "rẽ yĩnga neb sẽn mi-bã makda ne sẽn pa mi-bã?". Ad yaa yam bεεlã rãmb n tagsd n getẽ.
Yeele: "yaa yãmb m yembs nins sẽn kõ sɩda, zoe-y Soabã, yel-sõmb be ne neb nins sẽn maneg dũni-kãngã pʋgã; la Wẽnd Tẽngã yalmame, ad b pidsda sugrã rãmb b keoor tɩ pa yɩ ne geelg ye".
Yeele: "ad maam, b sagl-m lame tɩ m tũ Wẽnde, tɩ m yaa sẽn yɩlg dĩinã ne-A,
B leb n sagla maam tɩ m yɩ lɩslaambã rẽenem".
Yeele: "ad mam yaeesdame tɩ m sã n kɩɩs m Soabã, ra-kãsengã raar naongo''.
Yeele: "Wẽnd la mam tũuda tɩ m yaa sẽn yɩlgd m dĩinã ne-A.
Bɩ y tũ bũmb ning yãmb sẽn rat tɩ pa Yẽnda. Yeele: "ad bõndbã yaa neb nins sẽn bõn b mens la b zags rãmb dũni yikr raarã, ad rẽnda la bõn vẽenega.
B tara b zugẽ wã Bugum pala, la tẽngrã me pal n be beenẽ, yaa rẽ la Wẽnd bugsd ne A yembsã: "Mam yembsã! Bɩ y zoe Maam".
La neb nins sẽn zãag b mensã ne rʋbsã n pa rat n tũ-ba, la b lebs b mens Wẽnd nengẽ wã, sũ-noog be ne bãmba, bɩ f noog M yembsã sũuri.
Neb nins sẽn kelgd-b gomdã n tũud a sẽn yɩɩd sõmblemã, bãmb la neb nins Wẽnd sẽn kãnde, la bãmb la yam bεεl rãmba.
Ned ning namsg koεεg sẽn sɩdg a soab zugu, rẽ yĩnga fo tõe n põsg sẽn be a Bugum pʋga?
La neb nins sẽn zoe b Soabã, bãmbã tara rot tɩ b yĩngrã me be rot sẽn me, tɩ ko-sood zoet b tẽngre. Yaa Wẽnd pʋlengo, Wẽnd pas yigdg pʋleng ye.
Fo pa yã tɩ Wẽnd sika koom sẽn yi saagẽ wã, t'A kẽes-a ko-ninẽ Tẽngã pʋga, rẽ poorẽ t'A yiis kood t'a kõbgã yaa toor-toore, rẽ poorẽ t'a zelge, tɩ fo ne-a t'a yaa kõodre, rẽ poorẽ t'a maan-a t'a yaa sẽn zendge, ad be rẽ pʋgẽ, tẽegr ne yam bεεl rãmba.
Rẽ yĩnga ned ning Wẽnd sẽn pak a yãoog ne lɩslaoong tɩ yẽ be nuura (vẽenem) pʋgẽ sẽn yi a Soabẽ wã? Rẽnd wɩɩbd be ne sũy sẽn kʋɩ n yi Wẽnd yʋʋr tẽegre, bãmbã bee meneng sẽn vẽneg pʋgẽ.
Wẽnd sika goam sẽn yɩɩd sõmblem, t'a (Aaya sãnda) wõnd taab n yɩlembdẽ, tɩ neb nins sẽn yaeesd b Soabã yĩn-gãnd sidgdẽ. Rẽ poorẽ tɩ b yĩn-gãndã la b sũyã yõgendẽ n tʋgd Wẽnd yʋʋr tẽegre. Wãndã yaa Wẽnd kãndgr t'A kãndgd A sẽn rat a soaba, la Wẽnd sẽn menemesd a soab pa tar kandgd ye.
Rẽ yĩnga ned ning sẽn gũus a neng ne naon-wẽnga dũni wã yikr raarã, ɑ wõndɑ wɑlɑ b sẽn na n yeel wẽgdbã: "lemb-y bũmb ning yãmb sẽn da yɩ n tʋmdẽ wã".
Neb nins sẽn reng bãmb taoorã yagsame, tɩ naongã wa-b zĩig ning b sẽn pa tẽede.
Tɩ Wẽnd kɩt tɩ b lem yãnd dũni vɩɩmã pʋgẽ, la laahr naongã n yɩɩd bedrem, tɩ b sã n ra yɩ n miime.
La sɩd la hakɩɩka, Tõnd wẽe bilgri ne nebã Alkʋrãan-kãngã pʋga, bilgr buud fãa, sãnd-sãnde bãmb na tẽege.
Alkʋrãan sẽn yaa laarabiindu, sẽn pa tar goalma, sãnd-sãnde b na zoe Wẽnde.
Wẽnd rɩka bilgr ne yem-raoogo zu-soaben-dãmb sẽn zabd taab a poorẽ, la rao (a to ), ra-yεng sẽn so-a, rẽ yĩnga bilgr pʋgẽ b wõnda taaba? Pẽgr be ne Wẽnde, pa woto ye, b wʋsg fãa pa mi ye.
Ad fo (Mʋhammad) yaa kiida, la ad bãmb me yaa kiidba.
Rẽ poorẽ, yikrã raare y Soabã nengẽ la y na n bʋ ne taaba.
Ãnd wẽgd n yɩɩd ned ning sẽn yag Wẽnd zugu, la a yags sɩdã a sẽn wa n wa a nengẽ ? Rẽ yĩnga ka Gεhannem pʋgẽ n yaa gãag zĩig ne kɩfr-rãmbã?
La neb nins sẽn wa ne sɩdã (ɑ Mʋhɑmmɑd…), la sẽn sɩdg a sɩdã (Muumin-dãmbã), bãmba la Wẽnd zoetbã.
Bee b Soabã nengẽ b yĩnga b sẽn tʋll bũmb ninga, woto la manegdbã rolbo.
Bʋɩl yĩng tɩ Wẽnd na yaaf-ba, wẽng ninga b sẽn tʋmã, la A rol-b b keoorã, sõmblem sẽn yɩɩd bũmb ning bãmb sẽn tʋmã.
Rẽ yĩnga Wẽnd pa sek A yamba? La b bugsda foom ne bũn-zẽms sẽn pa Yẽ, la Wẽnd sẽn menes a soab pa le tar ned sẽn na n kãnd-a ye.
Wẽnd sẽn kãndg a soab pa le tar menemsd ye, rẽ yĩngɑ Wẽnd pa wilb Naab n yaa maan n roalg Soab sɩda?
La fo sã n sok-ba: "ãnd n naan saasã la Tẽngã?" B na yeele: "yaa Wẽnde". Yeele: "yãmb yãame, bũmb ning yãmb sẽn boond tɩ pa Wẽndã, Wẽnd sã n rat maam ne naongo, rẽ yĩnga bãmb yaa naongã pãrgdb bɩ? Ma A sã n rat maam ne yolsgo, rẽ yĩnga bãmb yaa A yolsgã yõkd bɩ?" Yeel: "Wẽnd seka maam, Yẽ la bobl-m-mens rãmbã bobl ne-A"
Yeele: "yaa mam neba! Tʋm-y y sẽn tõe tɩ mam yaa tʋmda, la y na wa n bãnge".
Ned ning naong sẽn wat a soab nengẽ n ningd-a yãnde, la sig a zug naon-duumdga.
Ad Tõnd sika gafã fo zug nebã yĩng ne sɩda, la ned ning sẽn kãnda yaa a meng yĩnga, ned ning sẽn menema me, rẽnd a menesda a menga, la fo pa boabld b zug ye.
Wẽnd n kʋʋd yõyã b kũumã wakato, la sẽn pa ki-b b gõeem wakat me, t'A yõk a sẽn bʋ kũumã a soab zugã, la A bas a to wã n tʋg wakat sẽn yãk raare, ad yel-soalem be rẽ pʋgẽ ne neb sẽn tagsd n getẽ.
Bɩ b gãda sugsdb tɩ pa yɩ Wẽnde? Yeele: "baa tɩ b sã n yɩɩme n pa so bɑɑ fʋɩ, la b pa tar yam?".
Yeele: "ad sugsg fãa yaa Wẽnd n so, Yẽ n so saas la Tẽng naam, rẽ poorẽ yaa Yẽ nengẽ la y na n lebe".
La b sã n tẽeg Wẽnd A Yembr yelle, la neb nins sẽn pa kõ sɩd ne laahrã sũy sẽn yikdi, la b sã n tẽeg rʋbsã b sẽn tũud tɩ pa Yẽ wã, la b sẽn noogd b sũuri.
Yeele: "yaa m Soaba! Saas la Tẽng Yẽbgda, yel-soaandɩ la sẽn vẽneg Mita, Foo n bʋʋd F yembsã ne taab sʋka b sẽn da yɩ n yõsd taab bũmb nins zugã".
La baa tɩ neb nins sẽn wẽgbã sã n tar bũmb ning sẽn be Tẽngã pʋg gilli, la rẽ bilgri n lagem-a, b na n yao ne-a n fãag b menga n yi naon-wẽngã dũni wã yikr raare, tɩ vẽneg ne bãmb Wẽnd nengẽ, bũmb ning bãmb sẽn da pa yɩ n tẽedã.
Tɩ vẽneg ne bãmb bũmb ning b sẽn tʋmã wẽnga; tɩ sig bãmb zugu, bũmb ning bãmb sẽn da yɩ n yaandẽ wã.
La keelem sã n paam ninsaala a boonda Tõndo, rẽ poorẽ, Tõnd sã n tedg-a ne neema sẽn yi Tõnd nengẽ la a sẽn yete: "ad b kõ-a-la maam m bãngr yĩnga". Pa woto ye, ad a yaa zarb-n-gεsga, la ad b wʋsg fãa pa mi ye.
Sɩd la hakɩɩka, sẽn reng-b bãmb taoorã ra yeel-a lame, la pa naf bãmba bũmb ning bãmb sẽn da yɩ n paamdẽ wã ye.
Tɩ paam bãmb bũmb ning b sẽn tʋmã wẽnga. Neb nins sẽn wẽgd bãmbã pʋgẽ wã (b sẽn tʋm a Mʋhammad neb nins nengẽ wã) me na n paama bũmb ning b sẽn tʋmã wẽnga, la bãmb pa põsdb ye.
Rẽ yĩnga, b ka mi tɩ yaa Wẽnd n yεdgd rɩtlã n kõt A sẽn rat a soaba, la A yõbgdẽ? Ad bee woto pʋgẽ, tagmas-rãmb ne neb sẽn kõt sɩda.
Yeele: "Mam yembs nins sẽn maan n zʋʋg b mens zugã! Ra wãag-y tẽeb ne Wẽnd yolsgã ye, ad Wẽnd yaafda zũunuubã zãnga, ad Yẽnda la yaafg Naab n yaa yoalsda".
La y lebg n tʋg y Soabã nengẽ, la y sak n tũ-A, taoor tɩ naongã na n pa wa yãmb nengẽ ye, rẽ poore b pa sõngd-y ye.
La y tũ sẽn yɩɩd sõamã n yaa bũmb ning b sẽn sik n kõ yãmb n yi y Soabã nengẽ wã, taoor tɩ naongã na n pa wa yãmb nengẽ ne lingri, tɩ yãmb pa tẽed ye.
Mɑɑ taoor tɩ yõor ra wa yeele: "yaa mam nims ne bũmb ning mam sẽn maan kʋɩɩng Wẽnd wεεngẽ, la m da yɩɩme n lagem yaandba''.
Maa a yeele: "Wẽnd sã n da kãndgẽ maam, m rag na zĩndẽ wẽn-zoetbẽ wã".
Maa a yeel a sẽn wat n yã naongã: "m sã n da tõe n lebge, n paam n zĩnd manegdbẽ wã, (pɑ são)?".
Yaa woto, sɩd la hakɩɩka Mam Aayayã ra waa fo nengẽ tɩ fo yags-ba, la f waoog f mengɑ, la f ra yɩɩme n yɑɑ kɩfre.
La dũni wã yikr raare, fo nee neb nins sẽn yag n roglg Wẽndã tɩ b nemsã sobge. Rẽ yĩnga pa Gεhannam pʋg n yaa gãag zĩig ne waoog-m-meng rãmba?
La Wẽnd fãagda neb nins sẽn zoe-b Wẽndã, ne bãmb sẽn paam pʋɩɩrã t'ɑ kẽes-b ɑrzãnã, wẽngã pa sɩɩsd bãmb ye, bãmb pa sãamd b sũur me.
Wẽnd la bũmbã fãa Naanda, Yẽ me la bũmb fãa bobl a meng ne-A.
A soo saas la Tẽng kʋɩlen-biisi, la neb nins sẽn kɩfl ne Wẽnd Aaya-rãmbã, bãmb la bõn rãmba.
Yeele: "Rẽ yinga zẽng sẽn pa Wẽnde la yãmb sagend maam tɩ m tũ, yaa yãmb a zɩtba?"
La sɩd la hakɩɩka b tʋmsame tɩ wa fo nengẽ la neb nins sẽn reng fo taoorã nengẽ: "tɩ fo sã n maan lagem-n-taare, hakɩɩka fo tʋʋmdã na lʋɩ, la f na lagem bõn rãmba".
Bɩ f tũ Wẽnd la f lagem bark pʋʋsdbã.
Lɑ lɑgem-n-tɑɑrã rãmb pa zɩsg Wẽnd A zɩsgr tεkẽ ye, tɩ Tẽngã fãa gill yaa A yõng-vuka yikrã raare, tɩ saasã yaa sẽn põd ne A rɩtgo, yɩlgem be ne Wẽnd, A naam leb n zẽkame n yi bũmb ning b sẽn maan ne-A lagem-n-taarã.
Tɩ b peeb Baorgã, tɩ sẽn be saasẽ la Tẽngẽ fãa ki, rẽnda Wẽnd sẽn tʋll a soaba, rẽ poorẽ tɩ b le peeb peebg a to tɩ bãmb yaa sẽn yik n yas n getẽ.
Tɩ Tẽngã pɩl ne a Soabã nuura, tɩ b rɩgl Gafã, la b wa ne nabiyaam-rãmbã la sεεtbã, tɩ b bʋ bãmb ne taab sʋk ne sɩda, b pa na n wẽgd-b ye.
La b pids n kõ yõor fãa a sẽn tʋme, la Yẽnda (Wẽnde) n yɩɩd minim ne bũmb ning b sẽn tʋmdã.
La b kãag neb nins sẽn kɩfl-bã zãma-zãma n tʋg Gεhannem, hal tɩ b sã n wa ta-a, b pakda a ragnoyã, t'a gũudbã yeel-ba: "Rẽ yĩnga tẽn-tʋʋmbã pa wa yãmb nengẽ sẽn yi yãmb pʋgẽ n karemd yãmb y Soabã Aayay la b bugsd yãmb ra-kãngã sεgbã?" La b yet tɩ yaa sɩda, la yɑɑ namsg koεεg n sɩdg kɩfr-dãmb zugu.
Tɩ b yeel: "kẽ-y Gεhannem ragnoyã tɩ y yaa ruumdb a pʋgẽ, rẽnd waoog-m-meng zĩndig zĩig yɩ wẽnga".
La b peeg neb nins sẽn zoe b Soabã zãma-zãma n tʋg arzãna, hal tɩ b sã n wa ta-a tɩ b pak a ragnoyã t'a gũudbã yeel-ba: Tɩlgr be ne-yã, y yɩlg yã (wʋme-y noogo), bɩ y kẽ-y-yã-a tɩ y yaa ruumdba".
Tɩ b yeele: "pẽgr be ne Nɑɑb ningã sẽn sɩdga tõnd A pʋlengã la A kõ tõnd Tẽngã tɩ yaa faado, tɩ d zĩ arzãnẽ wã d sẽn ratẽ; ad tʋmdb keoor be neema".
Tɩ fo ne Malεgsã tɩ b gũbg Al-ʿarsã, n yɩlg ne b Soabã pẽgre, tɩ B bʋ bõn-nɑɑndsã ne taab sʋk ne sɩda, tɩ b yeel: "Pẽgr be ne Wẽnd sẽn yaa bõn-naandsã Soabã".