The Noble Qur'an Encyclopedia
Towards providing reliable exegeses and translations of the meanings of the Noble Qur'an in the world languagesOrnaments of Gold [Az-Zukhruf] - Moore Translation - Rowwad Translation Center
Surah Ornaments of Gold [Az-Zukhruf] Ayah 89 Location Maccah Number 43
Hɑɑ mɩɩm [1]
M wẽen ne Gaf (Alkʋrãɑn) vẽnegdgã.
Tõnd maan-a lame t'a yaa Alkʋrãan sẽn yaa larabiindu, sãnd-sãnde y na tall yam.
Ad yẽnda bee gafã Ma sẽn be Tõnd nengẽ wã pʋgẽ; a zẽkame n bʋ n manege.
Rẽ yĩnga, Tõnd na n balla Tẽegrã n yi yãmba, tɩ yãmb yɩɩme n yɑɑ neb sẽn yaa maan-n-zʋʋg rãmba?
Lɑ Nabiyaam-rãmb sõor waoog Tõnd sẽn tʋms rẽenem rãmbẽ wã.
Nabiyaam pa yɩ sẽn na n wa b nengẽ, rẽndame tɩ b yɩ n yaand-a.
Tõnd halka sẽn yɩɩd bãmb ne keelem, la rẽenem rãmbã bilgr loogame.
La fo sã n sok-ba: "ãnd n naan saasã ne Tẽngã?" B na yeele: "wilb Naabã sẽn yaa minim Naabã n naan-ba".
ٱلَّذِي جَعَلَ لَكُمُ ٱلۡأَرۡضَ مَهۡدٗا وَجَعَلَ لَكُمۡ فِيهَا سُبُلٗا لَّعَلَّكُمۡ تَهۡتَدُونَ [١٠]
Soab ning sẽn naana Tẽngã n kõ yãmbã tɩ yaa sẽn yadge, la A leb n maan soay a pʋgẽ n kõ yãmba sãnd-sãnde yãmb na kãndgã.
Soab ning sẽn sik koomã n yi saasẽ wã ne zemsgo, tɩ Tõnd vɩɩms ne-a tẽng sẽn ki (sẽn kʋɩ), yaa woto bal la b na n yiis yãmba.
Yẽ la Soab ning sẽn naana kõbgã fãa gillã, la A naan kogend la rũms n kõ yãmb tɩ y tar n zomd n kẽnda.
Bʋɩl yĩng tɩ yãmb na zomb b poayã zutu, rẽ poorẽ tɩ y tẽeg y Soabã neema-rãmbã; tɩ y sã n wa yõgen n zomb-b bɩ y yeel: "yɩlgemd be ne Soab ning sẽn noma yãoã n kõ tõndã, lɑ tõnd da pa yɩ n na n tõogẽ-yã-a sã n pɑ Wẽnd sẽn wõr n kõ tõndã,
La Tõnd yaa lεbgdb n tʋgd d Soabã nengẽ".
La b maan pedg n kõ Wẽnde sẽn yi A yembsã pʋgẽ, ad ninsaal yaa sõm-zɩt sẽn vẽnege.
Bɩ A yãka kom-pugli Yẽ sẽn naanã pʋgẽ la A tũus kom-ribli n kõ yãmba?
La b sã n noog b yembr fãa sũur ne bi-buglɑ a sẽn rɩk n kõ Yolsg Naabã, la a nengã sẽn sobgde t'ɑ yaa sũ-toog soaba,
Ned sẽn wubd nag-teed pʋgẽ n pa tõe n fãag a meng n yi zabd-n-taaga ɑ poglem yĩngɑ lɑ yãmb yet tɩ yɑɑ Wẽnd biigɑ?
La b yet tɩ malεgs nins sẽn yaa Wẽnd yembsã yaa pagba, rẽ yĩnga bãmb seeda b naoonegã bɩ? B na n gʋlsa b kasetã la b soak-ba.
La b yeele: "Ar-rahmaan Naab sã n da ratẽ tõnd ra pa na n tũ-b ye". B pa tar bãngr baa fʋɩ a pʋgẽ ye, bãmb pa yɩ rẽnda zĩri-beed pasdb bala.
Bɩ Tõnd kõ-b-la gaf yẽ (Alkʋrãanã) taoore, tɩ bãmb gãd-a?
Pa woto ye, b yeelame: "ad tõnd mika d saam-rãmb dĩin zugu, la tõnd yaa kãndgdb bãmb vũunã zugu.
Yaa woto bala, Tõnd pa tʋms fo taoore bugsd fãa n tʋg tẽngẽ, rẽndame tɩ tẽngã rɩ-n-tɩkã rãmb yeele: "tõnd mika d saam-rãmb tɩ b be dĩin zugu, la tõnd yaa bãmb vũunã tikdba".
۞T'a (tẽn-tʋʋma) yeele: "rẽ yĩnga yãmb nɑ n kell n tikɑ y sɑɑm-dãmbã bɑɑ tɩ mam sã n wa yãmb nengẽ ne kãndgr sẽn yɩɩd yãmb sẽn mik y saam-rãmbã tɩ b tũudẽ wã? " La b yeel yã: "tõnd yaa kɩfr-rãmb ne bũmb ning b sẽn tʋms ne yãmbã".
Tɩ Tõnd na n rol-ba, bɩ f gese yagsdbã baasg yɩɩ wãn-wãna?
Tẽeg wakat ning a ɭbraahɩɩm sẽn wa n yeel a saambã ne a nebã: "ad mam zãaga m meng n yi yãmb sẽn tũudã;
Sã n pa Soab ning sẽn naana maamã, Yẽnda n na n kãndg maam".
La a maan-a t'a yaa gom-paadg a (ɭbraahɩɩm) pendẽ wã sãnd-sãnde b na lebg n tʋg Wẽnd nengẽ.
Pa woto ye, M wʋmsa bãmb ne b saam-rãmbã noogo hal tɩ sɩdã wa b nengẽ la tẽn-tʋʋm vẽenegã.
La sɩdã sẽn wa n wa b nengẽ wã, b yeelame: "yãoã yaa tɩɩm la tõnd kɩfla ne-a".
La b yeele: "b ra pa na n sikẽ Alkʋrãan-kãngã nin-zɩsg zug sẽn yi tẽmsã a yiibã pʋgẽ (Mak la Ṭaa'ɩfe)".
Yaa bãmb n pʋɩt fo Soabã yolsgã bɩ? yaa Tõnd n pʋɩ bãmb rɩtlã b sʋk dũni vɩɩmã pʋgẽ, La D zẽk sãnda dargε n yɩɩs sãnda, sẽn na yɩlẽ tɩ sãnda wõr sãnda. La fo Soabã yolsg sõmblem n yɩɩd b sẽn tigimd bũmb ningã.
La sã n pa nebã na n wa yɩ zãma a yembre yĩnga, D na naan n maan tɩ neb nins sẽn kɩfl-b ne Ar-Rahmaan Naabã, tɩ b rotã tar bεoongo sẽn yaa wanzuri la rads tɩ b tũud be n rʋʋda.
Tɩ b rotã leb n tar zag-noy la gãt tɩ b kɩl b zutu.
La faas-teedo, la wãnde fãa pa yɩ rẽnda dũni wʋm-noog bala, la laahrã, bee fo Soabã nengẽ, wẽn-zoεtbã yĩnga.
Lɑ ned ning sẽn suusda n yi Ar-Rahmaan Naaba yʋʋr tẽegre, D togend-a-la ne a Sʋɩtãan tɩ yẽnda yaa a lall-n-taaga,
La bãmb (Sʋɩtãambã) gɩta nebã n yit sorã, la b tẽedame tɩ b yaa kãndgdba.
Hal t'a (nedã) sã n wa Tõnd nengẽ a yetame: "M sã n da paamẽ tɩ maam ne foom (Sʋɩtãana) sʋka yaa wala yaang (wĩnto-pusengɑ) la wĩnto-lʋɩɩngẽ pɑ são! Ad yaa lall-n-ta-wẽnga (la foom a Sʋɩtãana).
La kõn n tol n naf yãmb rũnda, y sẽn wẽga yĩnga, bala yãmb naaga taab naongã pʋgẽ.
Rẽ yĩnga fo tõe n wʋmsa wʋngɑ, maɑ f nenes zoangɑ, bɩ ned ning sẽn be meneng sẽn vẽneg pʋgẽ?
Baa tɩ D loog ne foo, ad Tõnd yaa maan-n-roalg Rãmba ne-ba.
Mɑɑ tɩ D kɩt tɩ fo yẽnd pʋlen-wẽng ning Tõnd sẽn pʋlem-ba, ad Tõnd tara tõog b zugu.
Bɩ f gãd bũmb ning b sẽn tʋms fo nengẽ wã, ad fo bee so-tɩrg zugu.
La ad a (Alkʋrãanã) yaa zu-zẽkre ne foo la fo nebã, la yɩ bilf bala b na wa n sok yãmb ɑ yelle.
La f sok Tõnd sẽn tʋms-b rãmb sẽn reng fo taoorã: "rẽ yĩnga Tõnd maana soaben-rãmb zẽng sẽn pa a Ar-Rahmaan Naab tɩ b tũudẽ?"
La sɩd la hakɩɩka Tõnd tʋmsa a Musa ne Tõnd yel-soalmã n tʋg a Fɩr-ʿaoon la a zamã wã nengẽ, t'a yeele: "Ad mam yaa bõn-naandsã Soab tẽn-tʋʋma",
La a sẽn wa n wa bãmb nengẽ ne Tõnd yel-soalmã la b sẽn laade.
La Tõnd pa yɩ n na n wilg-b yel-solemd rẽndame tɩ yẽnda bedrem yɩɩda sẽn loogã, Tõnd yõk-b-la ne naongo, sãnd-sãnde b na lebge (n wa Tõnd nengẽ).
La b yeele: "foo ɑ tɩɩmã soaba! Kos f Soabã tõnd yĩnga (t'A zẽk naongã tõnd zugu) ne A sẽn pʋlem foo tɩ tõnd sã n kõ sɩdã A nɑ n zẽkɑ nɑngã; tɩ ad tõnd nɑ n kãndame t'A sã n zẽk nɑngã".
La Tõnd sẽn wa n zẽk naongã n yi-ba, la b sẽn yidg al-kaoolã.
T'a Fɩr-ʿaoon moon a zama wã pʋgẽ n yeele: "yãmb a zamã! Rẽ yĩnga pa maam n so Misra naam, tɩ ko-sood bãmbã yaa sẽn zoet mam tẽngrã, rẽ yĩnga yãmb pa ne sɩda?
Rẽ yĩnga mam sõmblem pa yɩɩd yãoã sẽn yaa yaalgã, la a pa tõe n gom tɩ fahmã.
Yaa bõe yĩng tɩ b pa na n sik faas-teed a zug sẽn yaa sãnem, mɑɑ malεgsã tong tɑɑbɑ n tũud-a n watẽ?"
T'a mɑɑn a nebɑ zɩtbɑ tɩ b tũ-a, ad b yɩɩ zãma sẽn yaa dĩin yitba.
La b sẽn wa n maan tɩ Tõnd gẽ wã, D maan-b lame n role, n bõr-b gilli.
Tɩ Tõnd maan-b tɩ b yaa reng-taoor la bilgr ne sẽn wat-b bãmb poorẽ.
La b sẽn wa n rɩk bilgr ne a Maryam biigã, la fo nebã sẽn kilsdi; (n yetẽ tɩ bãmb rʋbsã me pɑ são ɑ ʿIisa ye, b yɑool n tũu yẽ me, rẽnd bãmb ne b rʋbsã sã n yɑɑ Bugum rɑgiisi, rẽnd ɑ Mɑryɑm biigɑ me yɑɑ woto)
La b yeele: "tõnd soaben-dãmbã sõmblem n yɩɩd bɩ yaa yẽ?" Bãmbã pa rɩkd bilgr ne foo rẽnda no-koεεm bala. Pa woto ye, bãmb rag n yaa no-keem neba.
Ad ɑ ʿIisa pa yɩ rẽnda yamb bal Tõnd sẽn maan neema a zugu, la Tõnd maan-a t'a yaa tɑgmɑs ne ɭsrayεl koamba.
La Tõnd sã n ra tʋllẽ D na maan malεgs yãmb zĩigẽ, tɩ b leds yãmb Tẽngã poor zugu.(N tũud Wẽnd A Yembre)
La ad a (ʿIisa) yaa tagmas ne dũni wã yikri, bɩ y ra maan sik ne-a ye, la y tũ maam, yãwã yaa so-tɩrga.
La a Sʋɩtãan ra wa gɩd yãmb dɛ, ad a yaa bε sẽn vẽneg ne yãmba.
La wakat ning a ʿIisa sẽn wa n wa ne yel-vẽenesã, a yeelame: "sɩd la hakɩɩka m waa yãmb nengẽ ne bʋʋd sẽn manege; bʋɩl yĩng tɩ m na vẽneg yãmb yεl sãnda yãmb sẽn yõsd taab a zugã; bɩ y zoe Wẽnd la y tũ maam".
Ad Wẽnd la mam Soaba, yẽ me la yãmb Soaba; bɩ y tũ-A, ad yãoã la so-tɩrga.
Tɩ sulã yõs taab bãmb ne taab sʋka, la wɩɩbd be ne neb nins sẽn wẽgbã raar ning naong sẽn zabdã.
Rẽ yĩnga b kollda bũmb tɩ sã n pa dũni wã yikr sẽn na n wa b nengẽ ne lingr tɩ b yaool n pa miẽ.
Pa yã-to-kõn-n-gũs rãmbã yaa beem ne taab ra-kãngã raarã, rẽnda Wẽn-zoεtbã.
Yãmb ɑ Mam yembsã! Yaeesg pa be ne yãmb rũnda ye, la yãmb sũy kõn n sãam me ye.
Rãmb nins sẽn kõ sɩd ne Tõnd yel-soalmã, la b yɩ n yɑɑ moeembã;
Kẽ-y arzãn-yãmbã ne y pagb n kɩdembdẽ.
B gilgda bãmb zug ne sãnem lɑɑse (asεt-rãmbɑ) la ko-toeese; bũmb ning sẽn noom yõor fãa la nin sẽn nong n pid be, tɩ yãmb be a pʋgẽ n yaa paadba.
La yẽ la arzãn ningã b sẽn kɩt tɩ yãmb rɩk a faad ne bũmb ning yãmb sẽn yɩ n tʋmbdẽ wã yĩngã.
Yãmb tara tɩ-biis wʋsg a pʋgẽ n dɩtẽ.
Ad nin-wẽnsã, bãmb bee gεhanem naongã pʋgẽ n yaa paadba.
B pa valemd Bugmã bãmb zugu, tɩ bãmb be beenẽ tɩ b yaa sẽn wãag b tẽeb ne Wẽnd yolgã.
La Tõnd pa wẽg-b ye, yaa bãmb n da yɩ n yɑɑ wẽgdba.
Tɩ b moon n boole : "Foo Maaliki, kos f Soabã t'A kʋ tõnd tɩ d pemse", t'a yeel: "yãmb yaa pɑɑdba " (pɑɑb sẽn pa tar tεkɑ, n pɑ wãagdẽ).
Sɩd la hakɩɩka Tõnd waa yãmb nengẽ ne sɩda, la yãmb wʋsg fãa gill kisa sɩda.
Bɩ b rĩnga yelle, rẽnd Tõnd me yaa rĩngdba.
Bɩ b tẽedame tɩ Tõnd pa wʋmb b walengã la b wũnungã? Pa woto ye Tõnd tẽn-tʋʋmbã (Malεgsã) bee b nengẽ n gʋlsdẽ.
Yeele:"Ar-Rahmaan Naab sã n da tara biiga, mam na yɩẽ rẽenem n tũ-a".
Yɩlgemd be ne saas la Tẽng Naabã sẽn yaa Al-ʿars Naabã n yi bũmb ning bãmb sẽn sɩfdã.
Bɩ f bas-b tɩ b faood la b reemdẽ hal n wa seg raar ning b sẽn pʋlem-ba.
Yẽ n yaa Soab saasẽ, yẽ la Soab Tẽng zugu, Yẽ la bʋʋd Naab n le yaa minim Naaba.
La Soab ning bark yɩ wagalle sẽn so saas la Tẽng naamã la bũmb ning sẽn be b yiibã sʋka; tɩ dũni yikr minimã bee A nengẽ, tɩ yãmb lebgr zĩig yaa Yẽ nengẽ.
La b sẽn kot bũmb nins zẽng tɩ pa tũ ne Wẽndã pa tar sugsgã ye, rẽnda ned ning sẽn seeda ne sɩd la b miẽ.
Fo sã n sok-ba tɩ ãnd n naan-ba, b na yete: "yaa Wẽnde". La yaa wãn-wãn tɩ bãmb kedgdẽ?
La M wʋmdɑ (nabiyaamã) koεεgã ɑ sẽn yete: "m Soabɑ! Bãmbã yaa neb sẽn pa kõt sɩda".
Bɩ f ball n (yaaf ) bas-b la f yeel-b laafɩ koεεga; tɩ sã n yɩ bilf b na bãnge.