The Noble Qur'an Encyclopedia
Towards providing reliable exegeses and translations of the meanings of the Noble Qur'an in the world languagesThe winnowing winds [Adh-Dhariyat] - Moore Translation - Rowwad Translation Center
Surah The winnowing winds [Adh-Dhariyat] Ayah 60 Location Maccah Number 51
M wẽen ne sob-fugds fugb tεkẽ!
La ne sawat nins sẽn yong ne koomɑ!
La ne kogend nins sẽn zoet mogrẽ wã,tɩ yɑɑ yol-yole.
La ne malεgs nins sẽn yaa yembsɑ yεlã pʋɩtba (ne Wẽnd sɑgelle).
Ad b sẽn pʋlem yãmb bũmb ningã yaa sɩda.
La bãng tɩ yembsɑ Yaoobã na n yɩɩme.
La M wẽen ne saagã sẽn tar so-bugsã.
Ad yãmb ɑ Mɑk rãmbɑ y bee goam pʋgẽ sẽn kɩɩsd taaba.
Ned ning b sẽn wẽnems-a n yi sɩd-kũunɑ, yɑɑ b sẽn dɑ wẽng ɑ soɑb Wẽnd minimã pʋgẽ, t'ɑ pɑ nɑ n kõ sɩd ye.
B kãaba zĩri-be-nebã beedo.
B rãmb nins sẽn be bõrb pʋgẽ n yaa yam yaal-yaal rãmba.
B sokdame: "Rolbã raar yaa ra-bʋre?"
Raar ning bãmb sẽn be Bugum zugu, tɩ b zarbd-ba.
"Lemb-y yãmb nɑngã, yaa yãoã la bũmb ning yãmb sẽn da yɩ n yagsd-ɑ wã".
La ad wẽn-zoεtbã bee arzãn-rãmb la ko-nin pʋgẽ.
B yaa sẽn reegd bũmb ning b Soabã sẽn kõ-ba; ad bãmb rɑ yɑɑ manegdb taoor tɩ wã pa wa.
B ra yɩɩme n gõe bilf bal yʋng pʋgẽ.
La tõd-beed me, bãmb kota yaafa.
La bee bãmb arzεkã pʋgẽ bõaas pʋɩɩre, la b sẽn mong a soab pʋɩɩre.
La tagmas-rãmb be Tẽng zug ne bãng-n-wãak rãmba;
La yãmb mensã me wɛɛngẽ. Yãmb pa tɑgsd n getẽ?
La be saasẽ wã, yãmb rɩtlã, la bũmb ning b sẽn pʋlem yãmbã.
M wẽen ne saag la Tẽng Soabã, ad a yaa sɩd wala yãmb sẽn gomdã.
Rẽ yĩnga a ɭbraahɩɩm sãan waglã yẽsg waa fo nengẽ?
Wakat ning b sẽn wa n kẽ a nengẽ n yeele: tɩlgre! T'a yeele:" tɩlgre, yãmb yaa sãamba".
T'a zãandg n kẽng a zakã rãmb nengẽ n tɩ wa ne lul-nobdga.
N pẽneg-a nebã n yeele: "y pa na n rɩ?"
(Lɑ b sẽn pɑ rɩtã) ɑ yɑeesɑme n solg-b a yaεεsgã, tɩ b yeele: "ra yεεs ye"! La b noog a sũur ne biig sẽn yaa bãngda.
T'a pagã tool n kelem n wẽ a nengã n yeele: "pʋg-yãan-kiri!
Tɩ b yeele: ''yaa woto la fo Soabã yeel yã; ad Wẽnd la bʋʋd-Mita, n yaɑ Bãngda''.
T'a (ɭbraahɩɩm) yeele: ''yãmb wa n na n maana bõe yaa yãmb Tẽn-tʋʋmba?
Tɩ b yeele: "ad b tʋma tõnd tɩ d kẽng nin-wẽnsẽ''
Tɩ d tʋms b zug kug sẽn maan ne tãndo.
Sẽn ning tagmas fo Soabã nengẽ, mãan-n-zʋʋg rãmb yĩnga.
Tɩ Tõnd yiis ned ning sẽn ra be a (Tẽngã) pʋgẽ sẽn yaa muumin-rãmba.
La Tõnd pa mik a pʋgẽ, muumin-rãmb rẽnda zak a yembre.
La tõnd bas a pʋgẽ tagmase, neb nins sẽn yεεsd naon-zabdgã yĩnga.
La a Musɑ yellã pʋgẽ me, wakat ning Tõnd sẽn wa n tʋms-a a Fɩr-ʿaoon nengẽ, ne yel-soalem sẽn vẽnege.
T'a balle n bɑs-bɑ n teeg ɑ pãngã, n yeele: "ɑ Musɑ yɑɑ tɩɩm soaba, mɑɑ gãeenga,(n gomd ɑ sẽn pɑ mi)"
Tɩ Tõnd yõk-a ne a tãpã n fãeeg-b mogrã pʋgẽ, tɩ yẽnda yaa b sẽn sãbs a soaba.
La a ʿAad yellã pʋgẽ me yel-soalem be beenẽ, wakat ning Tõnd sẽn wa n tʋms b zugu, seb-kĩrã.
A pa basd bũmb a sẽn ta a zug rẽndame t'a maan-a t'a lebg wala bugdu.
La a Ṯamuud yellã pʋgẽ, wakat ninga b sẽn wa n yeel-ba: "wʋms-y noogo n tãag wakato"
Tɩ b maan n zʋʋg n yi b Soabã sagelle, tɩ sa-tãsrã rɩk bãmb tɩ bãmb getẽ.
La b pa tõog n yik ye, b pa yɩ n paam sõngr me ye.
La a Nuuh nebã hal pĩnda, ad bãmb yɩɩme n yaa tar-n-yi Dĩin rãmba.
La saagã, Tõnd me-a lame ne pãnga, la ad Tõnd yaa ɑ kɩrmsã Yalgdba.
La Tẽngã, Tõnd tẽeg-a lame, t'ɑ sɑkd zĩigɑ, la ɑd Tõnd lɑ Yalgdb sẽn be neere.
La bũmb fãa Tõnd naana buk a yiibu, sãnd-sãnde yãmb na tags n gese.
Bɩ y zoe n kẽng Wẽnd nengẽ, ad maam, m yaa bugsd sẽn vẽneg ne yãmb n yi-a.
La y ra maan soab-rãmb zẽng n lagem Wẽnd ye, ad maam, m yaa bugsd sẽn vẽneg ne yãmb n yi-A nɑngã.
Yaa woto bala, pa wa neb nins sẽn reng bãmb taoorã sẽn yaa tẽn-tʋʋma, rẽnda b yeele: "yaa tɩɩm soaba, maa gãeenga"
Rẽ yĩnga b sagenda taab ne-a la (b sẽn yetã)? Pa woto ye, ad bãmb yaa neb sẽn yaa maan-n-zʋʋg rãmba.
Bɩ f ball n bas-b tɩ fo pa yɩ n yaa b sẽn sãbs a soab ye.
La tẽeg tɩ ad tẽegrã nafda sɩd-kõtba.
La Mam pa naan zĩn-dãmbã la ninsaalbã, rẽnda b na tũ Maam yĩnga.
Mam pa rat rɩtl buud b nengẽ, M pa rat tɩ b rɩlg-M me ye.
Ad Wẽnde, Yẽ la rɩlgr Naaba, n yaa pãn-kεgeng Soaba.
La be ne neb nins sẽn wẽgbã, naong pʋɩɩre, wala bãmb tũud-n-taasã pʋɩɩr bilgri, bɩ b ra yãg ye.
Rẽnd wɩɩbd be ne sẽn kɩfl-bã, bãmb raar ning b sẽn pʋlem-ba.