The Noble Qur'an Encyclopedia
Towards providing reliable exegeses and translations of the meanings of the Noble Qur'an in the world languagesThe Ranks [As-Saff] - Moore Translation - Rowwad Translation Center
Surah The Ranks [As-Saff] Ayah 14 Location Madanah Number 61
Bũmb ning sẽn be saasẽ la sẽn be Tẽng zugu, yɩlga Wẽnde, la Yẽnda la zɩslem Naab n yaa yam-bedr Soaba.
yãmb ɑ neb nins sẽn kõ sɩd ne Wẽnde! Yaa bõe tɩ y yet bũmb ning y sẽn pa tʋmde?
Gẽeb yɩ bedr Wẽnd nengẽ ne yãmb sẽn na n yet bũmb ning yãmb sẽn pa tʋmde.
Wẽnd nonga neb nins sẽn zabd A sorã zug tɩ b yaa sẽn tedg taaba, tɩ bãmb yaa wala meoong sẽn remse.
La tẽeg wɑkɑk ning a Musa sẽn wa n yeel a neba: "yaa mam neba! Yaa bõe tɩ yãmb namsd maam, la sɩda yãmb miime tɩ mam yaa Wẽnd tẽn-tʋʋm n wa yãmb nengẽ?" La wakat ning b sẽn wa n daeegã, Wẽnd raaga b sũyã, la Wẽnd pa kãndgd neb nins sẽn yaa dĩin-yitbã ye.
La a Maryam biig a ʿIisa sẽn wa n yeele! "Yaa yãmb a ɭsraa-ɩɩl koamba! Ad mam yaa Wẽnd tẽn-tʋʋm n wa yãmb nengẽ, n yaa sɩdgd ne bũmb ning sẽn reng mam taoorã sẽn yaa Taooraatã, n leb n yaa sũ-noogd ne Tẽn-tʋʋm sẽn wat mam poorẽ, t'a yʋʋr la a Ahmad". La a sẽn wa n wa bãmb nengẽ ne vẽenesã la b sẽn yeele: "yãoã yaa tɩɩm sẽn vẽnege".
La ãnd wẽgb n yɩɩd ned ning sẽn pas zĩri-beed n roglg Wẽnde! Tɩ yẽnda yaool n yaa b sẽn boond a soab n tʋgd Lɩslaoongo. Wẽnd pa kãndgd wẽg-m-mens rãmb ye.
B ratame n na n kiis Wẽnd vẽenemã ne b noyã, la Wẽnd yaool n yaa A vẽenemã pidsd baa tɩ kɩfr-dãmb kisa.
Yẽ lɑ sẽn tʋm A Tẽn-tʋʋmã ne sor-wilgrã lɑ sɩd-tũudmã bʋɩl yĩng lɑ ɑ sõng-ɑ t'ɑ wil tũudum sor buudã fãɑ, bɑɑ tɩ lɑgem-n-tɑɑrã rãmb sã n kisgi.
Yaa yãmb neb nins sẽn kõ sɩd ne Wẽnde! Rẽ yĩnga m kõn n togl yãmb n tʋg tolb sẽn tɩlgd yãmb n yi naon-zabdga?
Kõt-y sɩd ne Wẽnde, lɑ A Tẽn-tʋʋmã, la y zabdẽ Wẽnd Sorã zug ne y arzεgs la y mense, rẽnda la sõma ne yãmba, tɩ yãmb sã n da miẽ.
A yaafda yãmb zũunuub-rãmb la A kẽes yãmb arzãn-rãmb pʋsẽ tɩ ko-sood zoet b tẽngre, zag-yɩlma, arzãn duumdgã pʋga, rẽnda la pʋɩɩr sẽn zɩse.
La sẽn be tol-kãngã (neema) a taabã yɑɑ bũmb yãmb sẽn nonge; yẽ lɑ sõngr sẽn yi Wẽnd nengẽ dũni wã pʋgɑ la yεl-mɑnegr sẽn pẽ. Lɑ noog Muumin-rãmbã sũyã.
Yãmb ɑ neb nins sẽn kõ sɩd ne Wẽndã! Yɩ-y Wẽnd sõngdb wala a Maryam biig a ʿIisa sẽn yeel Hawaarɩyʋʋmbã (Tũud-n-ta-tũusdsi):"ãnd n na n sõng maam n tʋg Wẽnd nengẽ? " Hawaarɩyʋʋmbã yeele: "tõnd yaa Wẽnd sõngdba" . Tɩ sull sẽn yi a ɭsraa-ɩɩl koambẽ wã kõ sɩda, tɩ sull me kɩfle, tɩ Tõnd sõng neb nins sẽn kõ-b sɩdã b bε wã zugu, tɩ b yɩ tõogdba.