The Noble Qur'an Encyclopedia
Towards providing reliable exegeses and translations of the meanings of the Noble Qur'an in the world languagesThe Sovereignty [Al-Mulk] - Moore Translation - Rowwad Translation Center
Surah The Sovereignty [Al-Mulk] Ayah 30 Location Maccah Number 67
Soab ning yɩ wagelle, Naam sẽn be a Soab nugẽ wã, Yẽnda yaa Tõod ne bũmbã fãa.
Sẽn naana kũum la vɩɩm, t'A na zarb yãmb n ges n bãng yãmb ned ning sẽn yɩɩd sõmblem ne tʋʋma.
Sẽn naana saas a yopoe n rog taaba, fo pa yãt Ar-rahmaan Naab naanegẽ wã yõs-taab ye, bɩ f yɩlem gesgo rẽ yĩnga fo nee võor bɩ?
Rẽ poorẽ bɩ f yɩlem n ges yɩleng a yiibu, gesgã lebgdame n wa fo nengẽ t'a yaa koangd n yaa sũ-sãang soaba.
La sɩd la hakɩɩka, Tõnd faasa Dũni saagã ne fɩtl-rãmbɑ, la Tõnd maan-a t'a yaa bõn-lobds Sʋɩtãambã yĩngã. Tõnd leb n segla bug-witg b yĩnga.
La be ne neb nins sẽn kɩfl-b ne b Soabã, Gεhanem naongo, la b lεbeng zĩig me yɩ wẽnga.
B sã n lobg-b a pʋgẽ, b wʋmda a sẽn sesde t'a yaa sẽn kot wɑla rʋko.
A rat n na n pusgame sũ-puur keelem, wakat fãa b sã n lobg sull a pʋgẽ, a gũudbã yet-b lame:"bugsd pa wa yãmb nengẽ la?"
Tɩ b yeele: "n-yee! sɩd la hakɩɩka, bugsd waa tõnd nengẽ tɩ tõnd yagse la d yeele: Wẽnd pa sik baa fʋɩ, lɑ yãmb pa yɩ rẽndame tɩ y be meneng sẽn bedem pʋga".
La b leb yeele: "la tɩ tõnd sã n da yɩ n wʋmdame maa d ra tara yam, d kõon n zĩnd bug-witgã koɑmb pʋgẽ ye".
Tɩ b sak n reeg b zũunuubã b zugẽ; rẽnd bug-witmã kẽedb zĩig zãag yã!
Ad neb nins sẽn yaeesd b Soabã ne A sẽn solgã fãa, bãmb tara yaafg la keoor sẽn bεdme.
Y rat bɩ y solg y goamã, maa y vẽneg-a, ad Yẽ mii sẽn be sũyẽ wã.
Rẽ yĩnga A pa mi A sẽn naane, tɩ Yẽ yaa bãng-pẽk Soɑbã n yaa kiba-Mita.
Yẽ la Soab ning sẽn maan Tẽngã n kõ yãmb, tɩ yaa sẽn nome, bɩ y kẽn a ween-n-vɩɩsẽ wã la y rɩ A rɩtlã, la lεbengã zĩig yaa Yẽ nengẽ.
Rẽ yĩnga yãmb maana bas-m-yam ne Sẽn be a saagẽ wã t'A kõ n bõrg yãmb ne Tẽngã, tɩ Tẽngã yaa sẽn dãmde?
Bɩ yãmb maana bas-m-yam ne Sẽn be a saagẽ wã t'A pɑ na n tʋms yãmb zug seb-fãeedga. Boto y na bãng Mam bugsgã sẽn yaa soaba.
La sɩd-sɩda, neb nins sẽn reng bãmb taoorã yagsame, la Mam kisgrã yɩɩ wãn-wãna?.
Rẽ yĩnga bãmb pa get liuuli wã bãmb zugẽ tɩ b yaa sẽn yεdgd b pɩgsã la b gõtẽ, bũmb pa gãt-b sã n pa Ar-rahmaan Naab ye; ad Yẽnda yaa Net ne bũmbã fãa gilli.
Bɩ yaa ãnda n yaa yãmb fãagd n sõngd yãmba zẽng sẽn ka Ar-rahmaan Naaba? Kɩfr-dãmbã pa yɩ rẽndame tɩ b bee belg-m-meng pʋga.
Bɩ yaa ãnd n rɩlgd yãmb t'A sã n yõk A rɩtlã. Pa woto ye, b kell n raeega waoog-m-meng pʋgẽ la zoe n zãɑg pʋgẽ.
Rẽ yĩnga ned ning sẽn kẽnda t'a yaa sẽn suri, yẽ n yɩɩd sor bãngr bɩ yaa sẽn kẽnda tɩrg sorã zugu?
Yeele: "Yẽ la Soab ninga sẽn naana yãmba; la A maan n kõ yãmba, tʋba la nin la sũyã; paood yãmb sẽn pʋʋsd barka".
Yeele: "Yẽ la Soab ning sẽn bõe yãmba Tẽngɑ pʋgẽ, la b na n tigma yãmb A nengẽ".
La b yetẽ: "yaa rabʋr la pʋlen-kãngã, tɩ y sã n togsda sɩda"
yeele: "ad a bãngr bee Wẽnd nengẽ, la sã n yaa ne maam, mam yaa bugsd n yaa vẽnegd bala".
Wakat ninga b sẽn wat n yã-a pẽem-pẽema, neb nins sẽn kɩfl-bã nems sãamdame tɩ b yeel-ba: yãoã la bũmb ning yãmb sẽn da yɩ n yẽgemdẽ wã".
Yeele: "yãmb yãame, Wẽnd sã n kʋ maam la sẽn lagem-b maamã, maa A yols tõndo, rẽ fãɑ be A nungẽ, lɑ ãnd n na n fãag kɩfr-dãmb n yi naong sẽn zabde?
Yeele: "yaa Yẽ la Ar-rahmaan Naaba, tõnd kõo sɩd ne-A, Yẽ me la tõnd bobl d mens ne, la yãmb na bãng ned ning sẽn be meneng sẽn vẽneg pʋga".
Yeele: "yãmb yãame, yãmb koomã sã n vẽeg beoog t'a yaa sẽn fõoge, ãnd n na n wa ne ko-bundum yãmb nengẽ?" ɑd kɑ be tɩ sã n pɑ Yẽ ye.