The Noble Qur'an Encyclopedia
Towards providing reliable exegeses and translations of the meanings of the Noble Qur'an in the world languagesThe reality [Al-Haaqqa] - Moore Translation - Rowwad Translation Center
Surah The reality [Al-Haaqqa] Ayah 52 Location Maccah Number 69
Tẽeg yel-yɩtgã. [Dũni yikrã sɩdgre]
Bõe la dũni-yikr sɩdgdã?
La bõe n wilgd foo bõe la sɩdgdã?
A Ṯamuud la a ʿAad yagsa peleng yɩgsã.
La sã n yaa ne Ṯamuudu, b halka bãmb ne tãs-kεgenga,
La sã n yaa ne ʿAad, b halka bãmb ne seb-fugdg sẽn yaa kεgenga.
A nom-a-la bãmb zug yʋnd a yopoe la rasem a nii sẽn pʋg taaba. Fo nee nebã a pʋgẽ tɩ b rʋrẽ wala tamar-giisi.
Rẽ yĩnga fo nee b pʋgẽ kεlld bɩ?
Lɑ ɑ Fɩr-ʿaoon la sẽn reng-b yẽ taoorã la a Mutafɩkaat (b sẽn lebg rãmb n kiblgã) waa ne tʋʋm-beedo.
Tɩ b kɩɩs b Soabã tẽn-tʋʋmã t'A yõk-b kõn-n-põsg yõkre.
Ad Tõndo, koomã sẽn wa n puuga, Tõnd rɩka yãmb yɑɑb-rãmbã koglgã pʋga.
Bʋɩl yĩng tɩ D na maan-a tɩ yaa tẽegr ne yãmba; la na kεlga tʋbr sẽn wʋmd gomde.
Tɩ b sã n wa fʋʋs Baorgẽ wã, fʋʋs-vuka.
La b zẽk Tẽngã la saasã n bõgs b yiibã bõgsg-vũka.
Ra-kãngã, Yɩɩbã yɩtame.
Tɩ saagã pãrg tɩ yẽndã lebg vɑlengɑ ra-kãng rɑɑrã.
Tɩ malεgsã be a kɩremsã. La tʋkda fo Soabã Al-ʿarsã (Naam Zaoorã) b zugu ra-kãngã raare, (malεgs a) nĩi.
Ra-kãng raarã, b ballda yãmba, ned baa a yembr pa solgd yãmb pʋgẽ ye.
La ned ning b sẽn wa n kõ-a a gafo ne a rɩtgo, a yetame: "reeg-y m gafã n karme",
"M da tẽeme tɩ mam na n sega m gεεlã.
Tɩ yẽnda be vɩɩm pʋg sẽn yaa yard vɩɩm.
N be Arzãn pʋg sẽn zẽke.
A tɩ-biisã fãsb pẽeme.
Rɩ-y la y yũ, tɩ yaa beelg ne yãmb sẽn dɑ tʋme rasem-rãmb sẽn loogã.
La ned ning b sẽn wa n kõ-a a gaf ne a goabga, a yetame: "b sã n da pa kõ maam m gafã pa são?
Tɩ m pa bãng m gεεl sẽn yaa a soaba.
M kũumã sã n da yɩẽ tεk-tεka pa são?
M arzεk pa naf maam ye!
Mam pãngã loog n basa maam.
Yõk-y-yã-a n balg-a soɑɑm-dɑgoɑngɑ.
Rẽ poorẽ kẽes-y-yã-a Gεhɩɩma.
Rẽ poorẽ kẽes-y-yã-a bãng pʋgẽ, a woglmã yaa kãntɩɩs pis-yopoe.
A ra yɩɩme n pa kõt sɩd ne Wẽnd sẽn yaa zɩsgr Naabã ye.
A ra pa pirsd ne ninbãan-ned rɩlgr ye.
Rẽnd pa be ne yẽ rũndã raarã zĩ-kãnga, zao ye.
Pa rɩɩb me ye, rẽnda nod meto.
Pa rɩt-a, sã n pa tʋʋm-beed rãmba.
M na wẽen ne bũmb ning yãmb sẽn ne.
La bũmb ning yãmb sẽn pa ne.
Ad yãwã (Alkʋrãɑnɑ) yaa Tẽn-tʋʋm sẽn yaa wagell koεεga.
A pa yɩɩl-yɩɩnd koεεg ye, paood yãmb sẽn kõt sɩda.
A leb n pa bãg-bʋgd koεεg ye, paood yãmb sẽn tagsde.
Yaa sẽn sig n yi bõn-naandsã Soab nengẽ.
A sã n dag n pas goam sãnda n roglg Tõnd zugu.
D na yõk-a a poorẽ ne rɩtgo.
Rẽ poorẽ, D na wãag a sũur gĩindi.
Tɩ ned baa a yembr pa be yãmb pʋgẽ sẽn tõe n gɩd Tõnd tɩ D pɑ tɑ-ɑ ye.
La ad yẽnda ( Kʋrãɑnɑ) yaa tẽegr ne wẽn-zoεtbã.
La Tõnd miime tɩ be yãmb pʋgẽ sẽn yaa yagsdba.
La yell sẽn yalẽ, a yaa bõn kɩfr-dãmb zugu.
La ad ɑ yaa sɩd vẽenega.
Bɩ f yɩlg f Soab zɩsgã yʋʋre.