The Noble Qur'an Encyclopedia

Urjiin kakadhe; yeroo inni bu’e (seene).

Hiriyaan keessan (Muhammad SAW) hin jallanne; hin dogoggorres.

Fedha lubbuu irraas hin haasa’u.

Inni (wanti inni dubbatu) wahyii buufamu qofa.

(Jibriil) kan humni isaa cimaatu isa barsiise.

Abbaa humnaa ta’ee (bifa Rabbiin irratti isa uumeen) ol ta’e.

Inni moggaa (samii) isa ol aanaa irratti (ol ta’e).

Ergasii dhihaatee gadis bu’e.

Hanga (fageenya) qabannaa gooboo (dagaanaa) lamaanii yookiin sana irra dhihoo ta’e. {2}

Gara gabricha Isaatti (Rabbiitti) waan wahyii godhe wahyii godhe. {2}

Onneen (Nabiyyii-SAW) waan arge keessatti homaa hin sobne.

Sila ergasii waan inni (yeroo mi’iraajaa) arge irratti isa mormituu?

Dhugumatti yeroo biraas isa argeera.

Qurquraa dhumaa (samii torbaffaa) biratti arge.

Ishee bira jannata qubsumaatu jira.

Yeroo wanti haguugu mukattii qurquraa haguugu (arge).

Ijji gamaa gamana hin jallanne, irras hin dabarre.

Dhugumatti, inni mallattoolee Gooftaa isaa gurguddoo irraa argeera.

Mee (taabota) Laatiifi Uzzaa (jedhaman) naaf himaa?

Manaatiin kan sadaffaa duubatti haftuu taates (naaf himaa)?

Sila isiniif dhiirri ta'eeti dubartiin isaaf taatee?

Isheen kun oggas qooda jalloodha.

Isheen maqoota isiniifi abbootiin keessan moggaaftani malee homaa miti. Rabbiin ragaa isheef hin buufne. Se’aafi waan lubbuuleen isaanii feetu feetu malee waan biraa hin hordofan. Dhugumaan qajeellloon Rabbii isaanii irraa isaanitti dhufee jira.

Moo namaaf waanuma hawwetu jira?

Aakiraafi tanduraatis Rabbiif taate.

meeqaa meeqaatu Maleeykota irraa samii keessa jiru? kan manguddummaan isaanii homaa hin fayyadne, erga Rabbiin nama fedhuuf hayyamee, jaallate malee.

Isaan Aakhiratti hin amanne moggaasa dubartootaa maleeykota moggaasu.

Isa irratti beekumsa homaatuu hin qaban. Shakkii malee homaa hin hordofanu. Shakkiin immoo dhugaa irraa homaa hin duroomsu.

Nama yaadannoo keenya irraa garagalee, jiruu addunyaa malee hin fedhin irraa garagali.

Kun beekumsa irraa daangaa isaaniiti. Rabbiin kee Isumatu nama karaa Isaa irraa jallate akkaan beekaadha. Inni nama qajeeles akkaan beekaadha.

Wanti samiilee keessa jiruufi wanti dachii keessa jirus kan Rabbiiti. Isaan hamtuu dalagan waan isaan dalaganiin isaaniif galata galchuuf isaan toltuu hojjatanis ishee caaltuu taate isaan mindeessuuf (uume).

Isaan sun warra dogoggora xixiqqoo malee dilii gugurdoofi sagaagalummaa irraa fagaataniidha. Gooftaan kee araaramni Isaa bal’aadha. Inni akkaan isin beeka yeroo dachii irraa isin uumeefi yeroo isin garaa haadha teessanii keessatti ulfa taatanii jirtan . Lubbuulee keessan hin qulqulleessinaa. Inni nama (Isa) sodaatu akkaan beekaadha.

Mee isa gara gale naaf himi?

Kan xiqqoo kennee, ergasii dhoorgate.

Sila beekumsi fagoottu isa bira jiraa? inni (isa) beekee?

Moo wanta barreeffamoota Muusaa keessa jirutu itti hin himaminii?

Kan Ibraahiim isa (ajaja Rabbii) guutees.

(Isheen sun) lubbuun dilii baadhattu ba’aa lubbuu biraa hin baadhattuudha.

Namaaf waan hojjate malee hintaane.

Hojiin isaa uf duratti ni mul'ata.

Achii booda mindaa guutuutu isaaf kennamaadha.

Xumurri (waan hundaas) gara Rabbii keetiitti.

Inni Isumatu kofalchiise; boochises.

Inni Isumatu ajjeese; jiraachises.

Inni cimdii lama, kormaafi dhalaa, uume.

Bishaan hormaataa irraa (uume), yeroo (gadaamessaa keessatti) nagamtu.

Uumuun boodaas isuma (Rabbuma) irra jira.

Inni Isa duroomseefi hiyyoomseedha.

Inni Isumatu Gooftaa Shi’iraati

Isumatu Aadii duraa balleesse.

(Ummata) Samuudis hin hambifne.

Ummata Nuuhis sana dura (balleesse) Isaan isaanumatu akkaan miidhaa raawwattootaafi daangaa darbitoota turan.

Ganda gombifamtuus gadi kuffise.

Wanti haguuge ishee haguuge.

Ni’imaa Rabbii keetii irraa kamiin shakkita?

Kun (Muhammad SAW) sodaachisaa sodaachistoota durii irraa ta’eedha.

Dhihaattuun (Qiyaamaa) dhihaatteetti.

Rabbiin ala isheef mul’iftuun hin jirtu.

Sila haasa’a kana (Qur’aana) irraa dinqisiifattanii?

Ni kolfituu! Hin boochanuu?

Haala isin dagamoo taataniin (irraa garagaltuu)?

Allaah’f sujuudaa; (Isuma qofa) gabbaraa {2}