The Noble Qur'an Encyclopedia
Towards providing reliable exegeses and translations of the meanings of the Noble Qur'an in the world languagesThe Overwhelming [Al-Ghashiya] - Uzbek translation - Alauddin Mansour
Surah The Overwhelming [Al-Ghashiya] Ayah 26 Location Maccah Number 88
1. (Эй Муҳаммад алайҳис-салоту вас-салом), сизга ўраб олгувчи (Қиёмат Куни) ҳақидага хабар келдими?
2. У Кунда (кофирларнинг) юзлари эгилиб қолгувчи.
3. (Бўйин ва қўл-оёқлари кишан ва занжирларни судраш билан) меҳнат-машаққат чеккувчидир.
4. (Улар) қизиган дўзахга кирур!
5. Қайнаб турган булоқдан суғорилур!
6. Улар учун бирон таом бўлмас, (уларнинг емишлари) фақат зорийъдан (заҳарли ва бадбўй тикансимон ўсимлик) бўлур!
7. У (еган кимсани) семиртирмайди ҳам ва очлиқдан халос ҳам қилмайди!
8. (Мўминларнинг) юзлари эса у Кунда (ўзларига ато этилган ноз-неъматлардан) шод-хуррам;
9. (Ҳаёти-дунёда Аллоҳ йўлида қилган) саъй-ҳаракатларидан рози бўлур.
10. (Улар) олий жаннатда бўлиб;
11. У жойда бирон беҳуда сўз эшитмаслар.
12. У жойда оқар булоқ бордир.
13. У жойда баланд сўрилар;
14. Ва (булоқ бўйига) қўйиб қўйилган қадаҳлар.
15. Тизиб қўйилган ёстиқлар.
16. Ва тўшалган гиламлар бордир.
17. Ахир улар туянинг қандай яратилганига боқмайдиларми?
18. Осмоннинг қандай кўтариб қўйилганига;
19. Тоғларнинг қандай тикланганига;
20. Ва Ернинг қандай ёйиб-текислаб қўйилганига (ибрат назари билан боқмайдиларми?!)
21. Бас, (эй Муҳаммад алайҳис-салоту вас-салом), сиз панд-насиҳат қилинг! Зотан, сиз фақат бир панд-насиҳат қилгувчидирсиз, холос.
22. Сиз уларнинг устида зўравонлик билан ҳукм юргизгувчи эмассиз.
23. Илло ким (бу панд-насиҳатдан) юз ўгириб, кофир бўлса;
24. У ҳолда Аллоҳ уни энг катта азоб билан азоблар!
25. Зеро, ёлғиз Ўзимизга қайтишлари бордир!
26. Сўнгра уларни ҳисоб-китоб қилиш (жазо бериш) ҳам ёлғиз Бизнинг зиммамиздадир!