The Noble Qur'an Encyclopedia
Towards providing reliable exegeses and translations of the meanings of the Noble Qur'an in the world languagesThe Forgiver [Ghafir] - Moore Translation - Rowwad Translation Center
Surah The Forgiver [Ghafir] Ayah 85 Location Maccah Number 40
Hɑɑ mɩɩm [1]
Gafã sigbã yii Wẽnd nengẽ sẽn yaa wilb Naabã n yaa Mitã.
Yaa zũunuub Yaafda, tuubg Rɛɛgda, nams-kεgeng Soaba, kũun lɑ yɩɩdlem Soaba. Soab kae tɩ sã n pa Yẽ, lεbeng zĩig yaa Yẽ nengẽ.
Pa maand tak-n-taar Wẽnd yel-soalmã pʋg rẽnda neb nins sẽn kɩfl-bã. Lɑ b gõobã n gilgd tẽmsã ra wa belg foo tɩ f tẽed tɩ yɑɑ b sẽn põs ye.
A Nuuh nebã ra yagsame, taoor tɩ bãmb na n pa wa ye, la zãma fãa mamsa ne b tẽn-tʋʋmã n na n yõk-a, la b maan tak-n-taar ne zĩri-beedo, sẽn na yɩl n yẽes sɩdã ne rẽ, tɩ mam yõk-ba, la mam namsgã yɩɩ wãn-wãna?
La yaa woto bal la fo Soabã gomd sɩdg neb nins sẽn kɩfl-bã zugu, tɩ bãmb yaa Bugum rãmba.
Rãmb nins sẽn zãad-b Al-ʿAršã, la sẽn be a kɩrensã yɩlgda ne b Soabã pẽgre, la b kõt sɩd ne-A, la b kot yaafa n kõt neb nins sẽn kõ sɩdã: "yaa tõnd Soaba! Fo gũbga bũmbã fãa gill ne yolsg la minim, bɩ F yaaf neb nins sẽn tuub la b pʋg Fo sorã, la f gũ-b ne Gεhɩɩm naongã.
D Soaba! La kẽes-b Aden arzãnã (arzãn ruumdg) ning Fo sẽn pʋlem ne-ba, la ned ning sẽn manega sẽn yi b saam-rãmbẽ la b pagbẽ, la b koambẽ, ad Foo la wilb Naab n yaa Bʋʋd-Mita.
La F gũ-b ne yel-wẽnse, la Fo sẽn gũ a soab ne yel-wẽns raaren-kãngã, sɩd la hakɩɩka F yols-a lame. La woto la pʋɩ-bedre!
Ad neb nins sẽn kɩfl-bã b boond-b la yikrã rɑɑre n yetẽ: "ad Wẽnd kisgrã ne yãmbã ɑ yɩɩda yãmb sẽn kisg y mensã, wakat ning b sẽn wa n boond yãmb n tʋgd lɩɩmaoongẽ wã tɩ yãmb kɩfendẽ wã".
La b yeele: "d Soaba! Fo kʋʋ tõnd noor a yiibu la F vɩɩms tõnd noor a yiibu, tɩ tõnd reeg d zũunuubã d zugẽ, la rẽ yĩnga sor bee sẽn na yi bɩ?"
Yaa woto bala, tɩ b sã n dɑ boond Wẽnd A Yembr la yãmb sẽn kɩfende, la b sã n lagem-A ne bũmb la yãmb sẽn kõt sɩda. Bʋʋdã bee ne Wẽnde, sẽn yaa zẽkr Naab n yaa Bedrã.
Yẽ la Soab ningã sẽn wilg yãmb a yel-soalmã, la A Sikd rɩtl n yi saasẽ wã yãmb yĩnga; la pa tẽegd rẽ rẽnda ned ning sẽn lebsd a menga (n tʋgd Wẽnd nengẽ).
Bɩ y kos Wẽnde, tɩ y yaa sẽn yɩlgd dĩinã ne-A baa tɩ kɩfr-dãmb kisame.
Yaa dargε-rãmb zẽkdɑ, n yaa Al-ʿarsã Soaba. A kõta wahɩ wã A sẽn rat a soab ne A sagelle, t'a na bugs tɩ b gũus sεg-taabã raare.
Raar ning bãmb sẽn vẽnegdã, tɩ bũmb pa solgd Wẽnd ye, ãnd n so naamã rũnda? Yaa Wẽnd sẽn yaa Yembrã n yaa Windã.
Rũndã b ronda yõor fãa a sẽn tʋme, wẽgd ka rũndã ye! Ad Wẽnd yaa Geel-tʋʋlg Naaba.
La f busg-ba, pẽnegrã raare (dũni yikr) tɩ sũyã sã n wa be koko-londẽ n wuki; wẽgdbã pa tar baa noanga, b pa tar sugsd me b sẽn reegd a yĩng ye.
A mii nin sẽn zãmbde, la bũmb ning yãad sẽn solgde.
La Wẽnd bʋʋda ne sɩda, la bũmb ning bãmb sẽn kot zẽng tɩ pa Wẽndã, b pa bʋʋd ne baa fʋɩ. Ad Wẽnde, Yẽ la Wʋmd n yaa Neta.
Rẽ yĩnga b pa kẽnd Tẽngã poor zugu, n getẽ yaa wãn-wãn la neb nins sẽn reng bãmb taoorã yɩ yã? Bãmb yɩɩme n yɩɩd bãmbã ne keelem la vũuna, tɩ Wẽnd yõk-b b zũnuubã yĩnga, la b pa tall gũud n yi Wẽnd ye.
Yɩɩ woto tɩ bãmb tẽn-tʋʋmbã ra wat bãmb nengẽ ne vẽenese, tɩ b kɩɩse, tɩ Wẽnd yõk-ba. Ad Yẽ yaa pãng Soab n yaa nams kãenkãe Soaba.
Sɩd la hakɩɩka Tõnd tʋmsa a Musɑ ne Tõnd yel-soalmã la Tõnd gom-lubdg sẽn yɑɑ vẽenegɑ.
N tʋg a Fɩr-ʿaoon ne a Haamaan la a Kaarʋʋn nengẽ, tɩ b yeel tɩ yaa tɩɩm soaba n yaa zĩri-be-neda.
La wakat ning sɩdã sẽn wa bãmb nengẽ n yi Tõnd nengẽ, b yeelame: "kʋ-y neb nins sẽn lagem-a wã komb-ribli la y bas b pagbã tɩ b vɩɩme". La kɩfr-dãmbã rabr pa yɩ rẽnda meneng bala.
La a Fɩr-ʿaoon yeel yã: "bas-y maam tɩ m kʋ a Musɑ, t'a sã n rat bɩ a bool a Soabã, ad mam yaeesda a na n tedg yãmb dĩinã, maa a puk sãang Tẽngã zugu".
T'a Musɑ yeele: "Ad mam kota gũudum ne mam Soabã, la yãmb Soabã, n yi waoog-m-meng ned fãa sẽn pa kõt sɩda ne Geelgã Raare".
Tɩ rao sẽn yaa sɩd-kõat sẽn be a Fɩr-ʿaoon zakã rãmbẽ n solgd a lɩɩmaoong yeele: "rẽ yĩnga yãmb na n kʋʋ raoa, t'a yeelɑme tɩ "m soab la Wẽnd" yĩnga? La sɩd la hakɩɩka a waa ne vẽenes n yi a Soabã nengẽ, a sã n yɩ n yaa zĩri-be-neda, a zĩri-beed be ne-a, la a sã n yɩɩme n yaa sɩd soaba, yεl nins sãnda a sẽn pʋlem yãmba paamd-y lame. Ad Wẽnd pa kãndgd ned ning sẽn yaa maan-n-zʋʋg soab n yaa zĩri-be-ned ye,
Mam nebã! Yãmb n so naamã rũnd-rũndã n yaa windb Tẽngã zugu, la ãnd n na n sõng tõnd n yi Wẽnd naongã (yellã) t'a sã n wa tõndo? La a Fɩr-ʿaoon yeel yã. "Mam pa wilgd yãmb rẽnda bũmb ning mam sẽn ne wã, la m pa peegd yãmb n tʋdgẽ rẽnda kãndgr sore".
Tɩ ned ning sẽn kõ a sɩdã yeele: "yaa mam neba! Ad mam yaeesda yãmb zug tɩ raar na n wa paam yãmb sẽn wõnd wala (Al-ahzaab raare) sulɑ rãmb raare".
Wala a Nuuh la a ʿAad la a Samuud nebã miningã la sẽn wa-b bãmb poorẽ wã, la Wẽnd pa rat wẽgd ne A yembsã ye.
La mam nebã! Ad mam yaeesda yãmb zugu, bool-taabã raare.
Raar ning yãmb sẽn loogd n zoetẽ tɩ y yɑɑ sẽn gũd y kuidsã, yãmb pa tar baa gũud n yi Wẽnd ye, la ned ning Wẽnd sẽn menes pa tar kãndgd ye.
La sɩd la hakɩɩka a Yuusuf ra waa yãmb nengẽ pĩndɑ ne vẽenese, tɩ yãmb pa bak n be sik pʋgẽ ne bũmb ning a sẽn wa ne yãmb nengẽ wã, hal t'a sẽn wa n maan kaalmã, yãmb yeelame: "Wẽnd kõn n tol n tʋms tẽn-tʋʋm a poorẽ ye". Yaa woto bala, Wẽnd menesda ned ning sẽn yaa maan-n-zʋʋg soab n yaa sik maanda.
Neb nins sẽn maan tak-n-taar Wẽnd yel-soalmã pʋgẽ tɩ pa yɩ ne daliil sẽn wa b nengẽ wã, gẽeg yɩ bedr Wẽnd nengẽ, la neb nins sẽn kõ sɩdã nengẽ. Yaa woto bal la Wẽnd pagd waoog-m-meng ned sẽn yɑɑ modg yood soɑbɑ fãa sũuri.
La a Fɩr-ʿaoon yeel yã! Foo Haamaana! Me bεoong zãntga (Tukɑ), sãnde, m na paam soɑyã.
Saasã soɑyã, tɩ m n lɩk n ges a Musɑ Soaba, la mam tẽedame t'a yaa pʋ-yagda. Yaa woto bal la b faas ne a Fɩr-ʿaoon a tʋʋmdã wẽnga, la b gɩd-a n yi sorã. A Fɩr-ʿaoon rabrã pa yɩ rẽnda halkr pʋgẽ bala.
Tɩ ned ning sẽn kõ a sɩdã yeele: "mam nebã! Pʋg-y maam, tɩ m na peeg-y n tʋg kãndgr sore".
Mam nebã! Ad dũni wã vɩ-kãngã yaa wʋm-noogo, la ad laahrã, yẽ la tablg roogo.
Ned ning sẽn tʋma wẽnga, b pa roand-a sã n pa a bilgr ye! La ned ning sẽn tʋma sõama, rao bɩ paga, t'a yaa sɩd-kõata, yaa bãmbã n kẽed arzãna, b rɩlgd-b-la a pʋgẽ, tɩ pa yɩ ne geelg ye.
La mam nebã! Yaa bõe tɩ mam boond yãmb n tʋdg põsg tɩ yãmb boond maam n tʋgd Bugmẽ?
Yãmb boonda maam tɩ m kɩfl ne Wẽnd la m lagem ne-A bũmb ning mam sẽn pa tar a bãngre, la mam boonda yãmb n tʋgd wilb Naab nengẽ, yaafg Naab nengẽ.
Sik pa be tɩ bũmb ning yãmb sen boond maam n tʋgdẽ wã, a pa tar võor dũni, a pa tar võor laahr me, la ad tõnd lεbeng zĩig yaa Wẽnd nengẽ, la ad maan-n-zʋʋg rãmba, bãmb la Bugum rãmba.
La yãmb na wa n tẽeg bũmb ning m sẽn yeel yã, la m bobla m yellã ne Wẽnde, la ad Wẽnd yaa Neta A yembsã zugu".
Tɩ Wẽnd gũ-a n yi bũmb ning b sẽn rabs-a wã wẽngɑ, tɩ naong wẽngã sig a Fɩr-ʿaoon zakã rãmb zugu.
Bugmã, b balld-b-la a zug yibeoog la zaabre, la raar ning dũni wã sẽn yikdã, b yetɑme: "kẽes-y a Fɩr-ʿaoon nebã nong sẽn yɩɩd kεgengã pʋgẽ".
La b sẽn wat n maan tak-n-taar Bugmã pʋgẽ, tɩ nin-valemsã yeel neb nins sẽn waoog b mensã: "tõnd da yɩɩme n pʋgd yãmba, la rẽ yĩnga yãmb tõe n roka pʋɩɩr Bugmẽ wã n bas tõndo?"
La neb nins sẽn yaa waoog-m-mensã yeel yã: "Tõnd fãa be a pʋgẽ, ad Wẽnd bʋʋ A yembsã sʋka, tɩ ned fãɑ reeg ɑ pʋɩɩre.
La neb nins sẽn be bugmẽ wã yeel Gεhannem gũudbã: " kos-y y Soabã t'A yols naongã tõnd zug baa tɩ yaa raar a yembre".
La b na n yeele: "rẽ yĩnga yãmb tẽn-tʋʋmbã ra pa yɩ n wat yãmb nengẽ ne vẽenese?" Tɩ b yeele: "yaa sɩda" . La b yeele: "bɩ y kose!" La kɩfr-dãmb kosg pa yɩ rẽnda meneng pʋga.
La tɩ Tõnd na sõng d tẽn-tʋʋmbã la neb nins sẽn kõ-b sɩda, dũni vɩɩmã pʋgẽ, la raar ning seetbã sẽn na n yikã.
Raar ning wẽgdbã padeng sẽn pa nafd-ba, la kãabg be ne-ba, la zag-wẽng be ne-ba.
La sɩd la hakɩɩka Tõnd kõo a Musɑ kãndgre, la D kõ a ɭsraεl koamb gafã faado.
Tɩ yaa kãndgr la tẽegre ne yam-bεεl rãmba.
Bɩ f maan sugr tɩ ad Wẽnd pʋlengã yaa sɩda, la f kos yaafg ne f zũunuubã, la yɩlg ne f Soabã pẽka, zaabr la yibeoogo.
Ad neb nins sẽn maan tak-n-taar Wẽnd yel-soalmã pʋgẽ, tɩ pa yɩ ne daliil sẽn wa b nengẽ, pa be b sũyẽ wã rẽnda waoog-m-meng b sẽn pa na n tol n ta-a, bɩ f kos gũudum ne Wẽnde, ad Yẽnda la Wʋmd n yaa Neta.
Saasã la Tẽngã naaneg bedrem n yɩɩd nebã naanego, la ad nebã wʋsg fãa pa mi ye.
La zoang ne nin soaba pa a yembr ye. Neb nins sẽn kõ-b sɩdã la b tʋm sẽn sõmbã ne wẽngdbɑ me pa a yembr ye; paood yãmb sẽn tẽegde.
Ad dũni wã yikr watame, sik ka a pʋgẽ ye, la ad nebã wʋsg pa kõt sɩd ye.
La yãmb Soabã yeelame: "kos-y-Ma tɩ M na reeg y yĩnga, ad neb nins sẽn waoogd b mens n yit Mam tũudmã, b na n kẽe Gεhannem tɩ b yaa yaalse.
Wẽnd la Naab ning sẽn maan yʋngã n kõ yãmba, bʋɩl yĩng tɩ y na paam yĩn-yõgneg a pʋgẽ; la wĩndgã tɩ yaa vẽemem. Ad Wẽnd yaa yɩɩdlem Soab nebã zugu, la ad nebã wʋsg pa pʋʋsd bark ye.
Woto yaa Wẽnde, yẽnda la y Soab hakɩɩka, bũmbã fãa Naandã, Soab kae tɩ sã n pa Yẽ ye. La yaa bõe tɩ y wẽnemsdẽ?
Yaa woto bal la neb nins sẽn da yɩ n kɩɩsd Wẽnd yel-soalmã wẽnemsda (n yit sor-tɩrgã).
Wẽnd la Soab ning sẽn maana Tẽngã n kõ yãmb t'a yaa tabendg zĩiga, la saagã t'a yaa wa meoongo, la A sʋʋr (nɑɑn) yãmb n maneg yãmb nɑɑnegã, la A rɩlg yãmb rɩ-yɩlmã. Yãmb Wẽnd-kãngã la yãmb Soabã, la Wẽnd albarak yɩ wagalle, sẽn yaa bõn-naandsã Naabã.
Yẽ la Vɩta, Soab kae tɩ sã n pa Yẽ, bɩ y kos-y-yã-A tɩ y yaa sẽn yɩlg dĩinã ne-A. Pẽgr be ne Wẽnd sẽn yaa bõn-naandsã Soabã.
Yeele: "ad b gɩdga maam tɩ m da wa tũ yãmb sẽn kot-b rãmb tɩ pa Wẽndã, wakat ning vẽenmã sẽn wa n wa mam nengẽ n yi m Soabẽ wã. B leb n sagla maam tɩ m sak n tũ bõn-naandsã Soabã".
Yẽ la Soab ning sẽn nɑɑn yãmb ne tom, rẽ poorẽ ne Mɑne, rẽ poorẽ zɩ-pelle, rẽ poorẽ t’A yiis yãmb tɩ yɑɑ bi-pεεlgɑ, rẽ poorẽ tɩ wɑ tɑ y keelem wɑkɑto, rẽ poorẽ tɩ yɩ nin-kẽembɑ, lɑ be yãmb pʋgẽ sẽn kiid tɩ pɑ tɑ woto ye, lɑ sẽn nɑ yɩl tɩ tɑ wɑkɑt sẽn yãk toɑɑgɑ lɑ sãn-sãnde y nɑ tɑll yɑm.
Yẽ la Soab ning sẽn vɩɩmsd la A kʋʋda, t'A sã n bʋ yelle, a yet-a lame: "yɩ". T'a be yɩɩbẽ!
Rẽ yĩnga fo pa yã neb nins sẽn maan tak-n-taar Wẽnd yel-soalmã pʋgẽ wã b sẽn yuusd-b yuusg ningã.
Neb nins sẽn yags-b gafã, la bũmb ning Tõnd sẽn tʋms ne tẽn-tʋʋmbã, b nɑ wɑ n bãnge.
Wakat ning bãn-daoogã sẽn wat n be b yubliẽ wã, la bãensã, tɩ b vuud-ba.
Ko-tʋʋlgã pʋgẽ, rẽ poorẽ Bugmã pʋgẽ, tɩ b yõogd-ba.
Rẽ poorẽ tɩ b yeel-ba: "yãmb sẽn da yɩ n maand lagem-n-taar ne bũmb ningã bεε?
Sẽn yaa zẽng tɩ pa Wẽndã? " La b yeel yã, "b menemame n bas tõndo, tõnd da pʋs n pa yɩ n kot bũmb ye". Yaa woto bal la Wẽnd menemsd kɩfr-rãmba.
Yãmb rol-kãnga, yaa bũmb ning yãmb sẽn da yɩ n noogd y sũur Tẽngã zug tɩ pa yɩ ne sɩdã yĩnga, la yãmb sẽn da yɩ n kɩdemdẽ wã yĩnga.
Kẽ-y Gεhannem ragnoyã tɩ y yaa ruumdba, la waoog-m-meng rãmb gãag zĩig yɩ wẽnga.
Bɩ f maan sugri, tɩ ad Wẽnd pʋlengã yaa sɩda, la Tõnd sã n wilg foom b sẽn pʋlem-b yεl ninsã sãnda, maa D kʋ-f lame, yaa Tõnd nengẽ la b na n lεbs-ba.
La sɩd la hakɩɩka Tõnd tʋmsa tẽn-tʋʋmb sẽn reng fo taoore, be b pʋgẽ Tõnd sẽn togs foom b rãmb yelle, la be b pʋgẽ Tõnd sẽn pa togs foom b yelle. Pa yɩ ne tẽn-tʋʋm t'a wa ne yel-soalem rẽnda ne Wẽnd tõogo. Wẽnd yellã sã n wa, b bʋʋdɑ nebɑ ne tɑɑb sʋkɑ ne sɩda, tɩ zaalmã rãmb bõn zĩ-kãnga.
Wẽnd la Soab ning sẽn maan rũmsã, bʋɩl yĩng tɩ y na zomb sãnda, la be b pʋgẽ y sẽn rɩte.
La yãmb tara nafa a pʋgẽ; lɑ y nɑ tall-b n ta tʋlsem sẽn be yãmb sũyẽ wã. Yaa rũmsã la kogendã me n rɩkd yãmba.
La A wilgd yãmb A yel-soalmã; yaa Wẽnd yel-soalem bʋs la yãmb kɩɩsda?
Rẽ yĩnga b pa na n kẽn Tẽngã zug n ges neb nins sẽn reng-b bãmb taoorã baasg sẽn yɩ to-to? B ra yɩɩme n waoog n yɩɩd bãmba, n tar pãng la keelem (pãng keelem) n yɩɩd bãmba la b tar vũun Tẽng zugu. La bũmb ning b sẽn da yɩ n tʋmdẽ wã pa naf-b ye.
B tẽn-tʋʋmbã sẽn wa n wa b nengẽ ne vẽenesã, b nooga b sũur n sek b mens ne bãngr ning sẽn be b nengẽ wã, tɩ bũmb ning b sẽn da yɩ n yaandẽ wã sig-b zugu.
La wakat ning b sẽn wa n yã Tõnd naongã b yeelame: "tõnd kõo sɩd ne Wẽnd A Ye, la d kɩfl ne bũmb ning tõnd sẽn da yɩ n maand lagem-n-taarã".
Tɩ b lɩɩmaoongã pa leb n nafd-ba, b sẽn wa n yã Tõnd naongã ye. Wẽnd sor la woto sẽn da reng taoor A yembsẽ wã, tɩ kɩfr-rãmb bõn zĩ-kãngã.